Guwahati, April 28: Bilsi 100-na bate India-ni bijangchioni gimaenggipa matburungko rimbapilna ine Assam-ni Kaziranga Tiger Reserve-o donggipa gimanasienggipa rokomsa burungni matmako 2,000 km-na bate chel·ao donggipa Madhya Pradesh-ni Kanha Tiger Reserve-ona rimangaha. Ma·mong sorkarini India a·songo matburungko biap damsaoni damgipinona rimange donanio ia bakrobatgipa ong·enga.
Ia matmani rokomko Asiatic wild water buffalo (Bubalus arnee) ine minga aro ian gimanasienggipa ba Endangered ine janapgimin matburung ong·a, jekon Assam-osan bang·bate nikna man·aiaha. A·gilsak gimiko mang 4,000-na komiesan ia matmarang da·o dongaiaha aro ianoni 99%-de Assam-on ong·a. Skangni chasongrangode ia matma India-ni bijangchion dongachim, indiba ru·uta bilsirangna skangan Kanha-oni gimaaha, aro 1979 bilsion uko uano bon·chote nikaha.
Da·o ia matmako uni dongchakram samsiarigipa biapona rimangpile donaniara ua jolo donggipa bangbanggipa biaprangko rakkina aro sam-bolrang aro matburungrangni janggi tanganio dakchakna ine ong·a.
Iandake a·dok damsaoni damgipinona matmarangko rimanganiko Assam aro Madhya Pradesh-ni sorkarirang dakchakenga, aro Wildlife Institute of India Kanha-ni samsiarigipa biaprangko matmarang dongchakna namgen ine baseaha. Ia programme-ni ning·ao dingtang dingtang bak dake mang 50-mang matmarangko rimangna miksongenga.
Matmarangko rimanganiko Kaziranga Field Director Dr Sonali Ghosh dakdilangaha, aro DFO Arun Vignesh dingtang dingtang nanggipa kamrangko ka·e on·angaha. Matmarangko songrena tarisamsoanirang, gipin matmarangoni ekate donanirang, aro uarangni be·en-bimangni an·seng-baljokaniko nianirangko Dr Bhaskar Choudhury aro Dr Saurabh Buragohain aro uamang baksa gipinrang nirokangaha.
Uandake March 19 aro April 10-ni gisepo mangsni dal·drobaenggipa matmarangko rim·e Kanha-ona rimangna skang dingtang ma·eke donchengaha.
Skanggipa bako matma mangbriko April 25-o rimchakatangaha aro salgittam songree April 28-o Kanha-ona sokangaha. Matmarangko burungona watna skang biapna ranta ong·atna chipchange donchengaha.
Matmarangko iandake rimangpile donanichi uarangko jelroroatna, Assam-o biap damsano donge a·sel ong·anirangko gimana kengniko komiatna aro India a·songo dal·gipa gadango matburungrangko ripingna kam ka·anirangko bilakatna dakchakgen ine official-rang aganenga.
Ru·utna salrangni gisepon gnigipa changna matmarangko rimangnasienga, aro uandaken, India-ni bijangchio matmarangko dongatpiltaianina namedake ja·ku de·anirangko nikna man·enga.
Na·simang iakoba nina man·gen:
Na·simang iakoba poraina man·gen: Garo Hills-o songre-songgabatani neng•nikaniko Meghalaya, Assam nangrime kam ka•enga: Tynsong
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
