Baghmara, Sept 28 : Da·ororo social media-rango South Garo Hills, Baghmara-ni Captain Williamson Memorial Government College-ni Principal, Madam Meena A Sangma-ni kosako dingtang dingtang matnangani aro jegalanirangko niksona gita man·engani gimin mamlako talbate u⋅ina gita Hub News, Mongolbar salo uko sing⋅sandianiko dakangaha.
College-o tikka su⋅aniko daktelna nanga ine ge⋅etaniko on⋅aniara kakket ong⋅ama ine sing⋅on, ian sorkarini ge⋅etaniko man⋅e ja⋅rikanisan ong⋅aia maina chatro chatrirangni aro skigipa sakantini vacinne data-ko DC-na submit ka⋅na nanga. Tikka su⋅kugijan bang⋅enga ine nike DC-ni ge⋅etanio pangchakesa salgnina vaccine drive-ko ong⋅ata ine aganchakaha.
Principalni kosako jegalgipara sak 300-na bata indiba saksamangmang chatroko notice tape ma⋅apako okama ine matnangani gimin sing⋅on, ia bi⋅sako okamani miksonganian uni dakbewalrang ra⋅chakna man⋅gijanirang dongani giminsa ma⋅apa baksa agangrike namatna kam ka⋅na ine miksonganisan ong⋅aia ine aganchaka.
Unbaksana, niam gita ong⋅gija kamo sikjotata ine matnanganina, ian college-o principal-na on⋅gimin bilo pangchake hajirani bewalo kamo donatanisa aro ian committe-ni niam gita porikkarangko ra⋅e watatgipako kamko rakkiasa ine aganchakangkuaha.
College-o tika su⋅kugija chatro-chatrirangko salchikking prakon sajinmana porikka ka⋅e niani report-ko am⋅ani bidingo chatro-chatrirango suk ong⋅gijanirang dongani gimin aro porikka ka⋅na sakprako gong 200 ba 500 ka⋅e ra⋅a ine matnanganina, ian bilsi 18 gapgipa sakantian tika su⋅na nanga ine ge⋅etgimin donga aro RTPCR-ni report sal 10-nasan choliaiani gimin uni ja⋅manode gital report-kon on⋅na nangaia indiba angade tangka ra⋅ani giminde ma⋅sija maina porika ka⋅aniko college-ode dakja ine aganchakskaaha.
Skigiparangna dormahako on⋅ja ine matnangengani gimin sing⋅on, ia matnanganide tol⋅drae matnanganisan ongaia, maina dormahako on⋅ani angni kam ong⋅ja uan directorate-oni watatgipako anga forward ka⋅ata aro uko treasury-onisa sakprakprakni account-onan wata indiba saksa contractual-o ka⋅gipani extention-ko man⋅sokujae anga mamingkoba dakna man⋅jaha uasan ong⋅aia ine aganchakaha.
A⋅bachengode Principal-kosan rikgalaniko social mediarango nikaiachim indiba ja⋅manchi Lecturer-rangkoba rikgalna agananirangko niksoaha ine sing⋅on, ian angni nama kamko nike mitam lecturer-rang chakpaaniko on⋅ani gimino haida unasa rikgalengakon indiba lecturer-rangko rikgalanide dal⋅a gualani ong⋅chongmota maina uamang MPSC-oni kamna watataniko man⋅e re⋅bae ka⋅giparangsa unigimin ian gualbeani ong⋅gen ine Principal aganchakaha.
Indake ong⋅engon, social media-rango skatang mamingkoba sandichenggija uni kosako seanirangko niksoe an⋅tangni suk ong⋅gijaniko parakata baksana iandake mikkangchi mamingko talchengija skatang gatatgenchimode uaba niamo pangchake ja⋅ku de⋅gen ineba Ma Meena mikrakatjolaha.
