Guwahati, Sept 20: Re•anggipa Sonibar salo, chadambe sakgniko Assam police-rangni goe galani gimin jegale Sombar salo, dingtang dingtang Bodo dolrang, Bodoland Territorial Region-o konta 12-na bandh-ko ong•atangaha.
Goe galako man•gipa chadambe sakgni, chong•motan Jwngsar Mushahary aro Janak Kr Brahma-ko police-rang, Kokrajhar-ni Ultapani jolo gital bikotgipa United Liberation of Bodoland bobil dol baksa gogrikanio so•otna man•aha ine a•kangengon, sianggipa chadambe sakgnini nokdangrangde uamangko bobil dolni manderang ong•ja ine aganskaahachim.
Koborko on•ani gitade, ia chadambe sakgniara, Assam aro ma•mong sorkari baksa tom•tomanina songgigrike bame on•gipa National Democratic Front of Bodoland-Saoraigwra dolni gitcham membor-rangsa ong•achim.
Indake ong•engon, ia chadambe sakgniko Assam police-rangni kragija dake goe galani gimin jegale Sombar salo dingtang dingtang Bodo dolrang, pring 6:00 bajioni attam 6:00 bajiona BTR jolrango bandh-ko ong•atangaha.
