Shillong, May 1: Sukrobar salo, Meghalaya a•dokni Chief Minister Conrad K Sangma, Chief Minister-ni Labour Income Grant & Health Transformation (CM-LIGHT) scheme-ko a•bachengate on•angenba, sak 11,000-na baten an•tangtangko biming segate kam ka•e cha•enggipa manderangna, crore 400-ni Labour cess fund-oniko sakprako gong 5000 ka•e tangkarangko chipe on•ataha.
Labour Commissioner Office aro Meghalaya Building & Other Construction Workers Welfare Board-ni International Workers Day-ko manianio, a•dokni Chief Minister, jinmana aganprakangengon, Meghalaya a•doko gong crore 29,000-ni nok-jamrangko aro ramarangko tarina krenge kam ka•anichi, ming 20,000 kamrangko nakatate on•na man•aha ine parakataha.
India a•song gimiko Meghalaya a•dokan, ta•rakbate economy-ni dal•roroanio gnigipa ong•enga ine janapatengon, a•dokni dal•roroaniko kim•kime ong•e 10 percent-o rakkina man•enga aro iachi gong crore 29,000-ni ming 5000 dingtang dingtang kamrangko da•o ka•enga ine Chief Minister parakataha.
Salgro salaramni gipin a•dokrango, unskilled labour-rangna salprako gong 400 ka•e on•engon, Meghalaya a•dokode salprakon gong 525 ka•e on•skaengani gimin ian salgro salaram jolode bang•batgipa ong•enga aro India a•song gimiko gittamgipa ong•enga ineba Chief Minister aganaha.
Ia gital CM-LIGHT scheme-ni bidingo talataniko on•angengon, sak 11,000-na baten sorkario biming segate kam ka•e cha•enggipa manderangna ia scheme-ni ning•o sorkari, sakprako gong 5000 ka•e tangkako on•enga aro ia salni gisepon ia tangkarangko uamangni bank account-rango chipatenga ine Chief Minister parakataha.
Tangkarangko on•ani bidingo talataniko on•angengon, ma•mong sorkarini dongimin niamrango pangchake 1 percent-kode pangnan labour-ni kajina dake ra•ronga aro ia kajinarangko ra•anichi labour department, gong crore 400-mang ong•na sipile tangkarangko man•aha ine Chief Minister parakataha.
Sorkario biming segate dingtang dingtang hajira kamrangko ka•e cha•enggiparangna sorkarini on•enggipa gipin namgnirangko janapatskaengon, lekka porana gong 1500-oni gong 14,300-ona, bia ka•na gong 8000-ona, ma•giparangna gong 10,000-ona, family & welfare pension-ko 50 percent-ona, kamoni neng•takani ja•man japrako gong 1500, sianirango gong 5000 aro sanna banani kamrangna gong 10,000-ona kingking dakchake on•anirang donga ine Chief Minister parakataha.
Unbaksana, gong lak 2-ni life insurance aro gong lak 2-ni accident coverage donga ineba ua aganaha.
Skulrangna dingtang dingtang dakchakanirangko on•ani bidingo janapatskaengon, a•dok gimiko sorkarini dakchake on•enggipa dam 12 skulrang donga aro ia skulrangna, nokrangko rikna gita skul damprako sorkari, gong lak 50-mang ka•e on•gen ine Chief Minister parakataha.
Kam ka•e cha•enggipa bang•bata manderangan sorkarini on•enggipa namgnirangko man•china gita, ia scheme-ni bidingo manderangna u•iatna awareness program-rangko ong•atchinaba ua, Labour department-ko didiangaha.
Na·simang iakoba nina man·gen:
Na·simang iakoba poraina man·gen: MBOSE HSSLC-ni result-ko May-ni 4 tariko parakgen
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
