Shillong, June 11: East Khasi Hills a·jao COVID-19 man·giparang komijaengani gimin Meghalaya sorkari, June 14 tarikoni June 21 tarikona lockdown-ko ra·dodapangtaina tik ka·angaha.
Sukrobar salsani gisepon East Khasi Hills a·jao sak 183 manderang COVID-19 man·daptaiaha aro uandaken da·o COVID man·e dongenggiparang sak 1,877 gapaha.
Meghalaya a·dok gimiko COVID man·e sianggiparang gimik sak 714 gapengahaon ia sak 714-oni sak 555-de East Khasi Hills a·jaon ong·skaachim.
East Khasi Hills a·jao lockdown-ko antisana ra·dodaptaina sorkari manchiangahaoba gipin dam 10 a·jarangnade sorkari, deputy commissioner-rangna pakwatangenba, nangani kri lockdown-ko aro niamrangko ra·gatangkuchina bilko on·angskaaha.
Sukrobar salo Meghalaya a·dokni Chief Minister Conrad K Sangma, West aro East Jaintia Hills a·jarango ong·enggipa COVID-ni obostarangko nina re·angaha aro uandaken ua joljol Jowai-o Deputy Commissioner-ni office-oni gipin cabinet minister-rang aro Shillong-ni official-rang baksa internet gita chanchirimangenba, East Khasi Hills a·jao antisana lockdown-ko ra·dodapangtaina tik ka·angaha.
“Gipin a·jarangode COVID-19 man·giparang ka·sinsin komiangengahaoba East Khasi Hills a·jaode komikujaengani gimin mikrake dongkuna nangenga ine nikenba chinga East Khasi Hills a·jaode antisana lockdown-ko ra·gatangkuna tik ka·aha,” ine tom·a matchotani ja·mano Chief Minister parakataha.
Gipin a·jarangna dongimin niamrangni gimin janapatskaengon, gipin a·jarangode lockdown-rangko ra·gatani bidingo deputy commissioner-rang obostarangko nigrike ja·kuko de·anggen indiba nangchongmota ong·gijagipa dokkanrangkode pilak biaprangon 20 percent-na bate kulina man·jawa ine Chief Minister parakataha.
“Badiaba biaprango obostarang namjabatangenga ine nikgenchimode bazar ba anti cha·gipa biaprangko deputy commissioner-rang chipatna gita man·aigen,” ine Chief Minister aganaha.
Manderangko salruragipa garirangni gimin janapatengon, commercial garirang, chong·motan bus, autorickshaw, taxi aro uandakgipa garirangko obostani kri watna man·gen indiba 20 percent-na bate watna man·jawa ine Chief Minister parakataha.
Chief Minister-ni parakatani gitade, da·o dipet a·dokni pilak biaprangon jinma tom·bimonganirangko ong·atna man·kujawa.
