Shillong, Jun 1: Shillong songjinmani Vivanta-o salgittamna ong•atenggipa Early Childhood Development (ECD) Implementation Science Workshop-ko Sombar salo, Meghalaya a•dokni Chief Minister Conrad K Sangma, a•bachengate on•angaha.
Ia ECD Implementation Science Workshop-ko, bi•sarangni dal•drobaanio simsak nirokaniko on•anio kamrangko namdapatna miksonge, Meghalaya Early Childhood Development Mission (MECDM), State Capability Enhancement Project (SCEP), Van Leer Foundation, aro Asian Development Bank (ADB) baksa nangrime ong•atenga.
Ia workshop-ko a•bachengate on•anganio a•dokni Chief Minister, jinmana aganprakengon, 2018 bilsio uni gital sorkariko jako ra•chengaonin, dingtanganiko ra•bana gitade gital scheme-rangko ba niamrangko nangtela ong•ja indiba gitcham scheme-rangkon nambate chu•sokatnasa nanga ine uo bebera•ani gnang ua kamko ka•baaha ine aganaha. Uni Chief Minister ong•chengani somoio media-ni sing•anirangna aganchakaniko gisik ra•atpilengon, ua somoio ua ki•tap segipa Shiv Khera-ni dilaniko man•e, ‘ua maming dingtangtegipa kamrangko ka•jawa indiba kamrangko dingtangesa ka•gen’ ine aganchakaha ine Chief Minister parakataha.
Ma•mong aro a•dok sorkarirangni scheme-rangara bang•batan gitcham scheme-rangko taridape on•asan ong•aia ine janapatengon, mongsonggipa ra•bianide, kamrangko chu•sokataniosa ong•a ine Chief Minister aganaha. Dingtang dingtang scheme-rangko nambate chu•sokatanichi Meghalaya a•doko pilak kamrangon dingtanganiko nikna man•engaha ineba ua aganaha.
MGNREGA-ni bidingo toe janapangengon, kamrangko bilakbate chu•sokatanichi, scheme-ko jakkalanio aro kam ka•giparangko rimnapanio gadang gittam batangaha ine Chief Minister parakatenba, apsan daken dingtang dingtang department-rangoba, kamrangko nambate chu•sokatanichi, ma•mongni scheme-rang aro externally aided project-rangko jakkalanio changbri changbongamang batangaha ine aganaha.
Chief Minister-ni parakatani gitade, ia sal somoirango gong crore 12,000-mang ong•gipa externally aided project-rangko Meghalaya a•doko ka•enga aro ian gipin chonchongipa a•dokrangnade batgipa ong•enga.
Dilgiparangni mongsonggipa ong•ani gimin janapangengon, dilgiparang dingtang dingtang neng•nikanirangko ma•sinaba gnang indiba dilgipao namdapatna skanian dongjaode maming dingtanganiko nikna man•jawa ine Sangma aganaha.
Sorkarirang pangnande gital chanchiani aro u•i-ma•sianirangko nangtela ong•ja indiba gitcham u•i-ma•sianirangkon nambate chu•sokatna man•anikosa nanga ineba Chief Minister aganaha.
Meghalaya a•doko an•pakenggipa me•chikrangni sianiko komiatna man•ani gimin janapatskaengon, skanggipade sorkari, an•o donggipa me•chikrangko hospital-rango an•pakatanichin ia neng•nikaniko namatna man•gen ine chanchiachim indiba ja•mano ning•tubate am•sandie nion, manderang re•ruraani korosrangchi, chel•a biaprango donganichi, an•o donggipa me•chikrangna dakchakani gri ong•anichi aro uandakgipa dingtang dingtang a•selrangchisa an•o donggipa me•chikrangni siani batroroenga ine ma•sina man•aha ine Chief Minister aganenba, iani giminsa sorkari da•o an•o donggipa me•chikrangko an•pakna skang donchakna, simsak nirokanirangko on•na aro tangka paisani gita dakchakaniko on•na Safe Motherhood Home-rangko kulie on•aha ine parakataha.
Re•baenggipa 2027 bilsio Meghalaya a•doko sokachakna sienggipa National Games-na tarisamsoanirangko janapatskaengon, ia National Games-na dal•dalgipa stadium-rangko rikani aro uandakgipa kamrangko matchotate on•anikode chu•sokgipa ong•aha ine aganna man•jawa indiba ia National Games-o a•dokni chadamberang aro kal•susagiparangni chu•sokgipa ong•anichisa ia National Games-ko sokachakanio chu•sokanikode tona man•gen ine Sangma aganaha.
An•o donggipa me•chikrangni siani, bi•sa bakgitchakrangni siani aro bi•sarangni dal•drobaanio simsak nirokanirangko on•ani bidingo Additional Chief Secretary Sampath Kumar aro gipin official-rang baksa chanchirimani ja•mansa, ma•gipa aro bi•sarangni namgnina kamko ka•na gita dingtang dingtang department-rangko bak ong•ate, MOTHER ba Meghalaya’s Outcome and Transformation in Health, Education, Rural Development & Social Benefit program-ko sorkari a•bachengataha ineba Chief Minister parakataha.
Me•chikrangna tangka paisani gita jakgitelani aro janggi tangani cholrangko on•na sorkari, Self Help Group (SHG)-rangko bilakbatatna a•bachengaha ine janapatengon, batanggimin bilsichetni gisepo SHG-rang Meghalaya a•doko dol 4500-oni dol 60,000-ona bariangaha ine Chief Minister aganaha.
Ma•mong sorkari aro a•dokni giseposan bakrimaigija a•doktangtangni gisepo bakrimna nangani aro a•dok damsa damgipinoniko skie ra•grikna nangani giminba ia tom•anio Chief Minister janapangaha.
Ia workshop-ko ong•atahani gimin organizer-rangko mittelpilangengon, saksa sakgipinoniko pangnan skie ra•grikangkuchina aro manderangna dangdike on•anio bakrime kam ka•china gita dingtang dingtang dolrangko Chief Minister didiangaha.
Ia workshop-ko a•bachengatanio dongpae aganprakanggipa gipin manderangara, Additional Chief Secretary Sampath Kumar, Van Leer Foundation-ni Patricia Nunez Zamora, Van Leer Foundation-ni Country Head Prakash Kumar Paul aro gipinrang ong•a.
Na·simang iakoba nina man·gen:
Na·simang iakoba poraina man·gen: SWGH-o World No Tobacco Day-ko manianga
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
