Williamnagar, Jul 21: Adita salrangna skang, East Garo Hills a•jani Samgong jolo, me•tra saksako so•otanio, Williamnagar-ni One Stop Centre aro Williamnagar Women Police Station-ni officer-in-charge (OC)-ni kamrango olgrokanirangko nikna man•aha ine Garo Students Union (GSU) Eastern Zone (EZ) matnangatenba, ia a•selni bidingo magisterial inquiry-ko dakchina, so•ota man•gipa me•chikni nokdangna gong lak 10 tangkako gamchina aro kosako janapgimin official-rangni kosako rakgipa ja•kurangko de•china dabiangaha.
GSU-EZ-ni parakatani gitade, so•ota man•gipa me•chik, me•asani ka•mikkenataniko man•ahani gimin ua apsan salon an•tangni ripeng sakgni baksa Williamnagar-ni One Stop Centre (OSC)-ona re•ange, an•tangna chel•chakaniko on•china mol•moleahachim. OSC-o kam ka•gipaba niamo pangchake, Williamnagar Women Police Station-ni OC-na u•iataha indiba ia me•trana maming chel•chakaniko on•gija, me•asani dongchakgipa biapchipaknasa uamangko watatskaaha ine GSU-EZ parakataha.
Ia me•chikna maming chel•chakaniko on•jahani a•sel dos dakgipa me•asa, uko an•tangni nok sepangon ka•saninggija dake attechi den•e so•otna man•aha ine janapatengon, ia me•chikna maini gimin OSC-o chel•chakanirangko on•na man•jaha aro ia me•chikko so•ote galna ka•mikkenatahaon maini gimin uko me•asani dongchakgipa biapchipaksa maming chel•chakaniko on•ani gri watatna nangaha ine GSU-EZ sing•doataha.
Ia me•chikna kenchakna nanganiko police-rangna u•iatani ja•man maming ja•kurangko de•jahani gimin aro ia me•chikna chel•chakanirangko on•jahani giminba GSU-EZ, police-rangko matnangataha.
Ia a•selni bidingo sing•sandie ra•na gita Sombar salo GSU-EZ-ni membor-rang, East Garo Hills a•jani Superintendent of Police (SP)-ko grongeon, iani bidingo Williamnagar Women’s Police Station-ni OC-ko suspend ka•aha aro ia a•selni bidingo talbate am•sandianirangko dakkuenga ine GSU-EZ-na u•iataha.
Williamnagar-ni manderangna naljokani aro chel•chakaniko on•na gita ua an•tangko on•kange kam ka•enga ineba East Garo Hills a•jani SP, GSU-EZ-ni membor-rangna ku•rachakaniko on•ataha.
Na·simang iakoba nina man·gen:
Na·simang iakoba poraina man·gen: Mawpat songni manderang block office nokdonggaaniko champenga
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
