A·dokgre, April 14: A·chik a·songna SSLC porikao Top 10-ni 10-gipa gadang-o pass ka·e ra·songko ra·bagipa Emalton D. Marak, A·dokgre, Sakwagre-oni ong·a. Ua class Nursery-oni A·dokgre, Reking-ni St. Andrew’s Secondary School-o class 10-ona poraienba, 2026 bilsini SSLC porikkao nambatgiparangni 10-gipa biapko man·e pass ka·angaha.
An·tangni ia gadang-o chusokanina Hub News-na agan-talatengon, ua chonaonin manderangni nambatsranggipa gadangko man·e chu·sokaniko nike didianiko man·aha aro chon·aonin ia rank ba gadangko man·a ua krenge poraibana a·bachengaha. A·bachengo SSLC porikkana poraimiting somoio ua somoirangko name jakkalna changjachim, maina poraina nanganirang bang·an baksana gisik bringbrangatanirang namen bang·beachim. Indake ong·genchimoba ua ka·sin ka·sin somoirangko jakkalna changbaaha aro mongsongbate uni somoirangko ua an·tangni poraianinasan jakkalbataiaha. Nokgipa Isol-ni dilani baksana uni ma·a pa aro skigiparangni didianiko man·e ua namgipa biteko man·a tikelroroaniko dontongjaha aro ia namgipa biteko man·a amaha ine uiataha.
Ia gadangko man·a ua salanti poraijringaniko dakangaha. Ua pringni chakate poraian baksana skul joka jamanba dikdiksa neng·take cha·e ringe lekkarangko poraipiltaianiko dakronga aro poraigiminrangko gualpiljana gita adita salrangni ja·manon nipiltaianiko dakrongachim ineba ua aganaha. Ua pangnaba somoiko nie porairongja, maina somoiko nigenchim ong·ode uni gisiko aratanirang sokbaiani gimin ua salo konta 5 ba konta 6 de porairongachim ineba ua aganaha. Ua Social Science subject-ko rakbate nika baksana poraina bang·batani gimin ua pangnan Social Science subject-ko porairongbata. Una agreba, ua mathematic subject-rangko salantian ka·e nironga maina salanti ka·e nija ong·ode basakobade gualaia aro uni gimin salanti ka·e niode ka·ani niamrangko rongtalbate u·ina aro gisik ra·kamna man·a ineba ua janapaha.
Mobile phone ian name jakkalja ong·ode chadamberangko cha·sotgipa ba namgija ramaona dilgipaba ong·na man·a uni gimin ua bang·bata somoion u·igija sing·anirangna aganchakaniko am·nasan jakkalbataia aro skatang rorame somoirangko re·atja baksana Social media-rangoni chel·e dongronga ineba ua aganangaha. Bon·kamao ua an·tangni nambegipa result-na, porikka seanio an·seng baljoke rakkianina aro namgipa gisikrangko on·anina Nokgipa Isol-ko de·mitele aganangaha. Iana agreba, ua an·tangni ma·a pa aro skigiparangkoba uni poraianio didianiko on·ahanina mitelataha.
Na·simang iakoba nina man·gen:
Na·simang iakoba poraina man·gen: Siang Upper Multi Purpose Project-na songni manderang chakpaaniko on•na a•bachenga
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
