Shillong, May 30: Sonibar salo, Exercise PRAGATI 2026-ni skanggipa bakko Shillong sambao donggipa Umroi Military Station-o matchotataha, jeon dol 400 troop-rang baksana dam 13 a·songrangoni a·gipibatgipa sipaini dilgiparangko rimbana dakchakaha. Dingtang dingtang a·songrang baksa ia ranta ka·aniko ong·ataniara sipai-ska ku·mong nangrimani, apsan kam ka·ani aro jolo donggipa army-rangni gisepo apsan nangrime kam ka·na tarisamsoe donganiko namdapatanian ong·aha.
Ia program-o bak ra·gipa a·songrango India, Bhutan, Cambodia, Malaysia, Maldives, Myanmar, Nepal, Philippines, Seychelles, Sri Lanka, Vietnam, Indonesia aro Laos-ko man·chapa.
Sipai kotokrangni changa sapani aro tarisamsoaniko nina gita a·briarigipa buringrango bobil dolrangko am·sandiani ranta ka·aniko konta 72-na ong·ate ia ranta ka·aniko matchotataha.
Ia program-ni bon·kamgipa salo Army-ni sak 6 Vice Chief-rang baksana sak 40-na bate a·gipibatgipa military official-rangba dongpae bak ra·angpaaha.
Army Staff-ni Vice Chief, Lieutenant General Dhiraj Seth, ia program-o bak ra·na gita gipin a·songoni watata man·giparangko rimchaksoan baksana chel·chakgipa dolrangni gisepo ku·mong nangrime kam ka·ani aro meli nangrimaniko mangrakbatatna gita dingtang dingtang a·songrangni sipai kotokrangni dilgiparang baksa dingtang tom·bimonganiko ong·atangaha.
Ia ranta ka·ani program-ko ong·atanio mingsa gisikko salbatgipara, Indian Army aro Federation of Indian Chambers of Commerce and Industry (FICCI)-ni ong·atgipa Defence Exhibition-an ong·aiaha, jeon Atmanirbhar Bharat ba an·tangon pangchakna man·aigipa India-ko ong·atani bak gita India-o tarigipa silchidrerang, technology aro chasong gitalni sipai kotokrangni dakbewalrangko mesokangaha.
Official-rangni aganani gitade, Exercise PRAGATI 2026, jolo donggipa a·songrangni sipairangni gisepo apsan nangrime kam ka·aniko mangrakbatatan baksana chel·chakgipa dolrangni nangrimaniko namdapatna dakchakaha aro mikkangchi India-ni sagal jolo iandakgipa ranta ka·aniko ong·atna mangrakgipa pangchakanikoba tariangaha.
Na·simang iakoba nina man·gen:
Na·simang iakoba poraina man·gen: APST certificate aro ILP baksa nangchapgipa neng·nikani bidingo a·dok sorkari nipiltaianiko dakna chua gadangni dol 4 committee-rangko songgen: Arunachal Pradesh CM
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
