New Delhi, Feb 8: A·songo game ge·e cha·giparangna dongimin Minimum Support Price (MSP), apsan daken dongaikugen ine da·al Sombar salni bako a·songni Prime Minister Narendra Modi, ku·rachakaniko on·angenba, minggittam niamrangko jegale re·anggipa September jaoni jingjengataniko bon·atchina game ge·e cha·enggipa manderangko didiangaha.
“Na·simangni jingjengataniko bon·atboha, an·ching apsan asonge agangrikna man·gen. Chinga na·simang baksa agangrikna kusi ong·enga aro da·alo anga na·simangko Rajya Sabha-oniba okamenga,” ine Rajya Sabha-o President-ni aganprakgipa kattarangni bidingo jera ra·grikengmiting somoio PM Modi aganaha.
“Skango jekai ong·a, apsan daken mikkangchiba MSP ong·angaikugen aro darangba iani bidingo ma·sisretataniko on·jachina,” ineba ua aganaha.
A·songo dingtanganiko ra·bana gita cholrangko on·na nanga ine janapatengon, “An·ching janggilchipakna ong·ja, mikkangchipaknasa ja·kuko de·na nanga,” ine PM Modi aganaha.
Gital Farm Laws-ko ra·gataniara MSP-ko ra·sekani gita ong·e neng·nikaniko ra·baani ong·gen ine a·songo game ge·e cha·enggipa manderang kenchaktokengani gimin hajalni hajal game ge·e cha·enggiparang da·o jagni batpile Delhi-ni a·palo donggipa rama dilmarango jingjengatanirangko daktokengachim ine nikna man·a.
A·songo bang·pagija a·arang donge game ge·e cha·enggiparang, 1971 bilsio 51 percent-oni da·o 86 percent-ona tang·doaha ineba Prime Minister parakataha.
“Da·alo, hectare gnina komibate a·a donggipa game ge·e cha·enggiparang 86 percent donga aro uan sak kror 12 game ge·e cha·enggiparang ong·enga. Ia game ge·e cha·enggiparangna a·song maming daito dongjama?” ine Modi sing·doangaha.
Sorkari ge·antian game ge·e cha·ani kamrangko namdapatani bidingo agantokaha indiba ia dolrang bang·batan an·piltokaha ineba Prime Minister, Congress dol aro Congress dolchi dilanggipa UPA sorkarini somoio Agriculture Minister ong·gipa Sharad Pawar-ko miksonge matnangataha.
“Game ge·e cha·enggiparangni jingjengatanina na·simang (opposition) sorkariko matnangenga indiba namroro silroroaninade dingtanganiko nanga ine na·simang game ge·e cha·enggiparangna aganna nangachim,” ineba ua aganaha.
