39 C
Tura
spot_img

Game ge•e cha•enggiparangna PM-Kisan-ni gnigipa bakko Modi, Krismasni salo on•gen

Must read

New Delhi, Dec 21: Game ge•e cha•enggiparangna tangka transfer ka•e on•ani scheme ‘PM-Kisan’-ni gnigipa bakko, India a•songni Prime Minister Narendra Modi, Krismasni salo on•atgen aro ia apsan salon ua game ge•e cha•enggipa manderang baksa internet gita agangrikatgen ine agriculture ministry-oni u•iataha. Ia PM-Kisan-ni gnigipa bako a•song gimikni sak million 80 game ge•e cha•giparangna gong kror 18,000 tangkarangko a•songni Prime Minister on•atgen.

Ia PM-Kisan-ni skanggipa bakko Modi, 2019 bilsio game ge•e cha•giparangna on•atahachim aro da•o hajalni hajal game ge•e cha•enggipa manderangni agriculture law-rangko jegale jingjengatengmiting somoioba ua ia scheme-ni gnigipa bakko on•attaina sienga ine u•iataha.

Ma•mong sorkarini ra•gatgipa agricultural law-ni minggittam niamrangara game ge•e cha•enggipa manderangni janggi tanganio neng•nikaniko ra•bagen ine ia niamrangko game ge•e cha•enggipa manderang jegaltokengachim indiba ian game ge•e cha•enggiparangna an•tangtangni game ge•e man•enggipa bosturangko palbadinganio dakchakani ong•gen aro gama ge•e kamrangko mangrakbatatna dakchakani ong•gen ine sorkari aganskaengachim.

“Krismasni salo a•songni Prime Minister, game ge•e cha•enggipa manderang baksa internet gita agangrikgen aro uni agangrikani somoio ua gital farm law-rangni bidingo aro ia niamrangchi maikai game ge•e cha•enggipa manderang namgnirangko man•genchim, uarangni bidingo agan-talate on•anggen,” ine Agriculture ministry-ni official-rang parakataha.

Ia PM-Kisan-ko ma•mong sorkari, 2019 bilsini February 24 tariko a•bachengatahachim aro ian game ge•e cha•enggiparangna jabriprako gong 2000/- ka•e bilsio gong 6000/- tangkarangko on•e dakchakani scheme ong•achim.

Ia scheme-ni ning•o tangka paisarangko December jaoni March jaona, April jaoni July jaona aro August jaoni November jaona transfer ka•e on•rongengachim.

spot_img

More articles

spot_img
-->

Latest article