A•dokgre, Oct 1: Sukrobar salo Meghalaya a•dokni Chief Minister Conrad K Sangma, North Garo Hills a•jani A•dokgre jolo donggipa dingtang dingtang producers group-rang baksa tom•aniko ong•atangaha aro ia tom•anio ua jinmana aganprakangengon, ia jolrango gama ge•ani kamrangko tang•doatna gita game ge•e cha•giparangko aro dingtang dingtang producers group-rangko nangrime kam ka•china didiangaha.
A•doko game ge•e cha•giparangna dakchakanirangko on•na miksonganio sorkari, Farmers’ Collectivisation for Upscaling Production & Marketing Systems (FOCUS) program-ko ra•gataha aro ia program-chi a•dok sorkari, game ge•e cha•enggiparangni dingtang dingtang neng•nikanirangko namatna man•gen ineba Chief Minister aganaha.
Meghalaya a•dokni pilak biaprangon game ge•e cha•gipa dolrang, ia scheme-ni ning•o on•enggipa tangka paisarangchi namgnirangko man•enga ine janapatengon, a•doko gama ge•ani kamrangko pangkamgipa ong•atna sorkari krenge kamko ka•enga ine Chief Minister parakataha.
Ia tom•anio ua A•dokgre jolo donggipa dingtang dingtang producers group-rang baksa agangrikangjolaha aro ia jolo donggipa dol 35 producers group-rangna gimik gong lak 31.15-ni cheque-rangko suale on•angjolaha.
