Tura, Feb 12: Re·anggipa Feb 9 tarikoni 11 tarikona ong·atanggipa SBI-Foundation-ni ning·o Gram Seva program-ko West Garo Hills a·jani Dadenggre Block-ni ning·o donggipa song dam 5-ona Dadenggre Sub Division-ni gital SDO Jagadish Chelani baksana SBI-Foundation-ni Officer-rang re·ange songni manderangko grongeaha.
Ia program-o SBI-Foundation aro Bakdil baksa nangrime bilsi gittamni project-rangko skanggipa changna West Garo Hills-o a·bachengataha. SBI-Foundation-ni gita ia project-ni ning·o songadamo janggi tanggiparangna namroro-silroroaniko ra·baani ong·enga.
Programko ong·atenba, lekka pora, an·seng-baljokani, chasongni kri changa sapani, computer class, rongtal-an·talani aro uandake bang·a dingtang dingtang namroro-silroroatani mongsonggipa kamrangko a·bachengate on·angaha. Songadamo janggi tangani namen dingtangani gimin uarangko tang·doatna aro nambata gadangona ra·bana gita, SBI-Foundation-ni ning·o ia Gram Seva program-ko ra·gataha.
SBI-Foundattion-ni ning·o Gram Seva, ian ge·sa mongsonggipa CSR program ong·a aro iani miksongara songadamrangni manderangni songsalo janggi tangani gadangko tang·doatna aro uamangna namgipa janggi tangani cholrangko on·na ong·achim.
Program-o pangchake, India a·songni dingtang dingtang a·dokrango SBI-Foundation-ni gita Gram Seva program-ko a·bachengate bilsi-gittamna kingking kam ka·e on·na miksongani ong·enga. Indake, skanggipa changna WGH a·jani songadamrango dangdike on·enggiparanga SBI-Foundation Mumbai, Bakdil Tura aro SBI-Regional Office, Tura ong·a. SBI-Foundation-ni skanggipa changna WGH a·jao donggipa song dam 5-rangko basee uamangni dangdike on·engiparangara – A·simgre, Dilsigre, Bolchugre, Sategre aro Sadolbra songrang ong·a.
Program-ko jako ra·e kam ka·dilenggipa officerrangara – Mumbai, SBI-Foundation Corporate Office -ni Deputy Manager Rajaram Chavan, Chandmari SBI Regional Office-ni Regional Manager, Dharmananda Banai, Tura Bakdil Office-ni Program Manager aro Gram Seva, Suraj Kumar Bhagat, Bakdil-ni Empowerment Co-ordinator Tra Shivani aro Bakdil-ni Team Leader, Agri Allied aro Climate Adoption, Mikwell Khonglam ong·a. Indake uamang, da·al Sukrobar salo kobor ra·timgiparang baksa tom·aniko ong·ate programni gimin che·em-che·em agan-talate on·angaha.
SBI-Foundation, Gram Seva Program-ni ning·o songadamrango janggi tangani gadangko tang·doatna kam ka·anirangara mongsongbate lekka-pora, rongtal-an·talani, an·seng-baljokani, samtangtango donggipa buring-bolgrimko ripingani, me·chikrangko bil gnangatani aro chadamberangko namroroatani, kangal-cha·asiako komiatani, namgipa ringani chiko on·ani, jabolrangko maidakgipa bewalo galna nanga aro songtang-noktangko rongtal-an·talatanirangan ong·a ine officerrang kobor ra·timgiparangna talataha.
Unomiting, Bakdil Women Empowerment-ni Co-ordinator Tra Shivani-ni kobor ra·timgiparangna talatani gitade, ia programni gita Bakdil, pilak namroro-silroroaniko on·na dam 10 dingtang dingtang biaprango gital napdapatanirangko dingtang dingtang Selp Help Group-rangna a·bachengate on·aha, jedakode me·chikma dolrangni Selp Help Group (SHG)ko bilakatna man·gen, iana Bakdil-ni gita ia pilak kamrangko ka·engaha aro unbaksana dingtang dingtang dolrang baksa melie songo noko janggi tangenggipa manderangna private development program-rangko a·bachengate on·a baksana ge 5 PHC-rangkoba chalaienga ine ua agandapaha.
Una agreba, program-ko chu·sokatna gita Bakdil, dingtang dingtang SHG dolrangna district ge·antion apsandakgipa project-rangko micro level development baksa melie a·bachengate on·engaha ine talatan baksa, Bakdil ia programko a·bachengatanio jolni MLA, DC aro Dadenggre SDO baksa ku·monge project-na nangenggipa tangka-paisarangni giminba chanchijolaha ineba Shivani talatjolaha.
