Tura, Sept 18: Budbar salo Tura-ni Circuit House-o Garo Hills Autonomous District Council-ni (GHADC) ong·enggipa obostani bidingo changgni joljol tom·e chanchirimanirangko dakaha aro uko Vibhor Agarwal, IAS, dilangaha. Skanggipa tom·aniko ruling aro opposition-ni Members of District Council (MDC-rang) tom·dake pringni 10 bajio a·bachengaha. Uni ja·mano attam-ni 3 bajio Tura-ni dingtang dingtang civil society organisation-rang aro senior citizen-rang baksa chanchirimanirangko dakangaha. Uandake sorkari-ni tik ka·enggipa bailout package aro GHADC-o kam ka·giparangni ja 44-na dormaha man·gija dongani bidingo salgimikni bako bang·a dingtang dingtang agangrikanirangko dakangaha.
Dormahani neng·nikanirangko namatna nanggen aro mikkangchinaba niamrangko dakna nanggen ine pilak bak ra·giparangan chanchigenchimoba, iarangko chu·sokatani bidingo dingtang dingtang cholrangko janaptokaha ine tom·ani matchoto Vibhor Agarwal kobor ra·timgiparangna parakataha. Pilak janapanirangko subcommittee see ra·rikaha aro uarangna kam ka·china a·dok sorkari-na agane on·atgen ine Agarwal aganaha. Sixth schedule-ko pe·na ba GHADC-ni bilko ra·sekna a·dok sorkari mamung miksongani dongja ineba ua talate on·a baksana tangkani aro Council-ko chalaiani bidingo pilak chanchie tik ka·anirangko Council-ni niamo janapgiminrangko ja·rike dakgen ineba ua aganangaha.
Gnigipa tom·aniko ong·aton, GSU, FKJGP, AYWO, AHAM, ADE, AAYF, A·CHIK, Mother’s Union, ANY, aro gipin civil society-rangni dilgiparang bang·a chanchirimanirangko dakangaha.
“Chinga bailout package-ko ra·chaka, indiba jaantini dormaharangko a·dok sorkari-ni on·aniko jegala. Ian niamni a·palo ong·gen aro Council-ni bil-ni kosako ong·gen,” ine FKJGP-ni Pritam Arengh parakataha.
“Tangkarang banoni sokbagen ine chinga sing·doanirangko dakenga. Tangka-paisarangni bidingo gital neng·nikanirangko ra·bagija a·dok sorkarini iako ra·gatna miksongani cholrangko manderang u·ina nangchongmota,” ine GSU-ni President Tengsak G. Momin janapaha.
Una agreba, ia tom·anio bailout fund-rangko parak ong·bate jakkalna amna gita escrow account-ko tariani bidingo agangrikanirangko dakangaha. Iandakgipa accountko tarianichi jakkalsretani dongjawa aro dormaharangnasan jakkalaigen ine u·iani cholko Public finance-ni bidingo namen u·i-ma·sigipa dolsa civil society-ni saksa mande talate on·angaha.
Ja-chikkungni dormaharangko GHADC-o donggipa tangkarangchi gamgen ine gital chanchiani ia salni bako nakataha. Ian bang·a manderangna, jekai MDCrang aro civil society group-rangni chanchisogijagipa katta ong·aha. Uandake ian gital chianchiani ong·a aro uko nambate u·ina ning·tubate am·sandianirangko dakanggen ine Vibhor Agarwal aganangaha.
Una agreba, NGO-rangna skang MDCrang baksa tom·aniko ong·atchengani mamung miksongani dongja aro GHADC-o kam ka·giparang baksaba tom·anirangko dakna chanchienga ineba Agarwal talate on·angaha.
Subcomittee-ni sal-45 on·gipa somoini bidingo janape, ua somoini gisepon preliminary reportko on·gen aro ning·tubate aro talbate reportko tarina ru·utbate somoirangko nanggen ineba ua talatangaha.
Da·asalni tom·anirang kontabri-na baten ong·angaha aro pilakan gisik nange bak ra·angaha. Subcomittee pilakni agananirangko serike ra·aha aro uarangko chimonge a·dok sorkarina on·gen. GHADC-ni dormahana neng·nikani namjabatroroengon aro manderangni chakchikna man·ani komiangroroengon, pilak manderangan Sixth Schedule-o janapgimin Council-rangni niamrangko rakkie sorkari-ni ja·ku de·aniko nichaksoenga.
Na·simang iakoba nina man·gen:
Na·simang iakoba poraina man·gen: Tikrikilla-o Free Medical Camp-ko ong·atanga
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
Download our app from playstore – Northeast Media Hub
