Shillong, Jan 14: Sukrobar salo, Meghalaya a•dokni Inspector General of Prisons, M Kharkrang, gital UTP van gari bolbongako Meghalaya Police-na pakwate on•angaha aro ia gital UTP van-rangko pakwate on•anganio East Khasi Hills a•jani Superintendent of Police (SP) S Nongtnger aro gipin police officer-rangba dongpae bak ra•angaha.
Ia gital UTP van-rangko dingtang dingtang district aro sub-divisional police-rangna on•anggen.
Indake ong•engon, Prisons Reforms ba pattokni kamrangko namdapatna gita Prisons department, adita kamrangko jako ra•na tik ka•angaha ine kobor on•aha.
Ia kamrangara, Prisons Department-ni katta bichong, chong•motan ‘Changing Life Through Corrective Steps’ ba ‘Namatani bewalrangchi janggi tanganiko dingtangatani’-ko talate on•na, Meghalaya State Skill Development Society (MSSDS)-ni dakchakanichi koidirangna jakni kamrang, jekai sabon tariani, ba•ra sikani, cha•ani tariani, computer-ni gimin ma•siate on•na, gama ge•ani aro uandakgipa kamrangko skie on•na, Indian Oil Corporation (IOC) baksa nangrime koidirangna kal•susaanirangko skie on•na, Prisons department-ko Prisons & Correctional Services ine mingskana, Pattoko kam ka•giparangni koidirangna dangdike on•ani bewalko dingtangatna aro New Shillong Township-ni gital a•ao Central Prison-ko rikanian ong•enga ine u•iataha.
