Agartala, Jan 14: Bristibar salo, Tripura a•dokni Chief Minister Biplab Kumar Deb-ko re•dilenggipa garini mikkango gari nosto ong•ani ja•man ia garini chadambe sakgniko Tripura-ni traffic police-rang, rim•angenba kragija dake dokaha ine matnangataha.
Ia chadambe sakgnini bimingara Angle Reang aro Abhijit Debbarma ong•achim ine ma•sina man•aha.
Dokako man•gipa chadambe saksani parakani gitade, Chief Minister-ni escort mikkango uamangni gari nosto ong•changani ja•man traffic police-rang, uamangko Lake Chowmhuni jolo donggipa traffic police station-ona rim•ange, saksa Kishore Banik minggipa traffic police aro unbaksa kam ka•gipa sakgni police-rang, uamangko kragija dake dokaha aro ja•mano New Capital Complex police station-ona pakwate on•ataha.
Ia chadamberang, garini pilak nangchongmotgipa lekkarangko aro driving licence-rangko on•ani ja•manoba traffic police-rang, uamangko CCTV camera donggijagipa kuturiona rim•ange doke roaha aro ja•mano police station-ona uamangko watatani ja•manoba kragija dake kal•ake roaha ineba ia chadamberang matnangataha.
Iani bidingo Tribal Students Federation ku•rangko on•angskaenba, ia chadamberangko kragija dake dokahani gimin traffic police-rang sing•doataha.
