Jowai, Jan 14: Sukrobar salo, West Jaintia Hills a•jani Deputy Commissioner Garod LSN Dykes, ia bilsio taritaigipa electoral roll-rangko dingtang dingtang political dolrangna sualataha aro ia electoral roll-rangko sualatanio Election-ni ADC DD Syngai, ADC Alexander Mukhim, EAC WK Kharbuli aro Election-o kam ka•enggipa gipin manderangba dongpae bak ra•angaha.
Ia gital electoral roll-rangko tariani bidingo jinmana talataniko on•angengon, 2022 bilsini January 1 tarikko qualifying date dake, 1-Nartiang (ST), 1-Jowai (ST), 3-Raliang (ST), 4-Mowkaiaw (ST) aro 7-Amlarem Assembly constituency-ni gital voter-rangko biming segatenba da•o West Jaintia Hills a•jani voter-rang sak 1,90,575 gapaha ine West Jaintia Hills a•jani ADC DD Syngai parakataha.
Special Summary Revision-o kamrangko ka•ahani gimin aro bakrimaniko on•ahani gimin ua dingtangmancha political dolni dilgiparangko, BLO-rangko, supervisor-rangko aro field officer-rangkoba mittelpilangaha.
Bilsi 18 ong•e electoral roll-rango biming segatkugijagipa manderangko biming segatchina gitaba ua didiangaha.
