Shillong, Aug 1: Gittamgipa changna ong•atenggipa Meghalaya Pineapple Festival-ko Sukrobar salo, Union Agriculture & Rural Development Minister Shivraj Singh Chouhan, Delhi songjinmani Dilli Haat-o a•bachengate on•angaha aro ia festival-ko a•bachengatanio, Meghalaya a•dokni Chief Minister Conrad K Sangma-ba dongpaaha.
Ia Pineapple Festival-ko a•bachengatanio, a•doko man•enggipa anarosrangko gipin biaprangona wataniko bariatna gita Meghalaya sorkari, Reliance Fresh, Amazon Karigar aro Blue Tokai Coffee Roasters baksa Memorandum of Understanding (MoU)-o soi ka•grikangjolaha.
Ia Meghalaya Pineapple Festival-ko a•bachengate on•anganio Union Agriculture Minister, jinmana aganprakengon, uni cha•e nigipa anarosrangoni Meghalaya a•dokni anarosrangan chi•batsranggipa aro bitchi bang•batsranggipa ong•a ine aganaha.
Meghalaya a•doko game ge•e man•gipa bosturangoni bang•batan ong•telaigipa a•salrangchi game ge•e man•giparangsa ong•a ine janapatengon, “Da•alo Delhi-ni balwarango Meghalaya-ni bibarangan gapaha aro Meghalaya-ni anarosranga namen dingtangmanchagipa ong•ani gimin ua anaros cha•aniko dontongna changpiljaha,” ine Chouhan aganaha.
Ia tom•anio a•dokni Chief Minister Conrad K Sangma-ba aganprakengon, Meghalaya a•dokni anarosrangko da•o pilak biaprangon manderang am•tokengani gimin bilsiprakon metric ton lak 1.5 anarosrangko game ge•e man•engaha ine parakataha.
Batanggimin bilsirango Meghalaya sorkari, fruit processing unit-rangko bang•en kulie on•na man•aha ine janapatengon, da•alo dingtang dingtang company-rang baksa MoU-o soi ka•grikanichi a•dokni game ge•e cha•giparang, an•tangtangni game ge•e man•gipa bosturangko bang•bate palna sim•na man•gnok ine Sangma aganaha.
2024 bilsio, Meghalaya a•doko tarigimin metric ton 682 anarosrangko EU, Gulf aro Southeast Asia-ona watatna man•aha aro metric ton 150 anarosrangko dingtang dingtang dolrang baksa bakrimanichi India a•songni dal•dalgipa songjinmarangona watatna man•aha ineba Chief Minister aganaha.
Ia Meghalaya Pineapple Festival-ko August 3 tarikona salantian pring 11:00 bajioni attam 8:45 bajiona Dilli Haat-o ong•atenga aro ia program-o dingtang dingtang stall-rang aro Chief Minister’s Meghalaya Grassroots Music Project (CMMGMP)-oni git ring•anirangkoba nikna man•enga.
Na·simang iakoba nina man·gen:
Na·simang iakoba poraina man·gen: Bilsi 30 batgipa manderangna Cancer Screening program-ko ong•ata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
