Guwahati, July 10 : Assam, Goalpara a·jao donggipa Paikan Reserve Forest-ni hectares 140 buringni a·arangko sekdrae donggiparangko ra·pilna, Goalpara District Administration July jani 11 tariko a·rikgalataniko a·bachengatgen. Ua biapko wate re·angchina gita uno songdonggipa manderangna July jani 10 tarikona somoirangko on·atahachim.
Paikan Reserve Forest-ni a·arang chu·gimik hectares 711 mang ong·a. Indake batanggimin bilsirango hectares 140 mangni gita a·arangko niamgri sekdraaniko nikna gita man·aha. Niamgri songdong a·chagiparangni a·sel buringo donggipa sambolrang aro matburingrangna nangchakeaniko ra·baaha ine Forest Official u·iataha. Ia sekdragimin biaprango dam 4 sorkarini skulrang, dam 1 private skul, dam 5 Anganwadi centre-rang, dam 8 Muslim-rangni olakkiani nokrang, dam 5 mande gopram biaprang aro dam 3 eidgahs ba olakichakram biaprang gnang.
Dhubri-ni District Administration-ba 3,500 a·arango ia apsandakgipa a·rikgalaniko adita salrangna skang mangmang dakangaha.
BJP dolni ku·wattimgipa, Pankaj Borbora, East Bengali manderangni vote-ko man·a mangmang gitcham Congress sorkari ripinge rakkienggipa buringni a·arango uamangko dongna on·aha ine matnangataha. BJP dol, iano songdongkamgipa Assamese manderangni bilko naljoke rakkina kamrangko ka·enga ineba ua agandapangkuaha.
Indake ong·engon, Sivasagar-ni MLA aro Raijor Dal-ni dilgipa, Akhil Gogoi, ua biapona re·angon, uko re·angna on·gija police dolrang uko rim·e ra·angskaaha. Ia a·rikgalaniara niamgri dakani ong·a baksana Constitution-ni kosako re·badeani ong·a ine aganengon, ian bang·pagija dongaigipa jatrangko mikkang nitee dakani ong·enga ineba janapataha. Uno a·rikgala man·gipa manderangna chu·onga gita on·pilskaaniko dakna nanga ineba Gogoi u·iataha.
Na·simang ia video-koba nina man·gen:
Na·simang iakoba poraina man·gen: M’laya sorkari, Group-D post-rangna interview ra·aniko dondikata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
