Shillong, June 27: Salsani cha·a-ringanina manderang ia somoio neng·e-dike jotton ka·esa man·tokengon, gipin gita nama janggi tanganiko man·pagijagipa manderangsa mongsongbate bang·a neng·nikanirangko ia salrango chagrongna gita nangenga, indake nichanggalako man·giparangoni ge·sara ma·gri-pagri ong·giparangko alduenggipa biapan ong·gen jean manderangni on·gilanirangchisa pangchakbataigipa ong·a. Unbaksana, da·oni somoio namjabegipa sabisini giproroengmitingo, manderang noktangtangoni ong·katna gitamangba man·tokjaengon aro on·gilanirang komiengon, ma·gri-pagrirangko aldu-mittange nirokenggipa nokko maidake chalaienggenchim an·ching sakantian chanchiatna gita man·gen.
Pilak neng·nikanirangko dakgrikbae ia somoio ma·gri-pagri bi·sarangni mikkango ka·dingsmitanirangko on·enggipara saksa pamong Croslin Marbaniang-ni chalaienggipa Shillong, Lumshyiap-ni Langkryding-A-o donggipa God’s Dream Children’s Home-o ong·a.
Ma·gri-pagrirangko nirokenggipa nok ba orphanage-o, pamong an·tangan sak 42 me·chik bi·sarang aro sak 44 me·a bi·sarangko aldu-mittange chu·gimik nirokatenga. Niatari altua gita nikoba, ua orphanage-o gisik sokgijagipa aro ja·a ba jak kora ong·giparangkoba nirokatjolenga, jechin bi·sarangna pilak nangarangko man·e on·anio boja gatdapa gita chacha ong·pilenga. Indimangba, ua noko dongenggipa bi·sarangni mikkango ka·dingsmitanirang pangnan dongkamskaa. Ma·gri-pagri ong·aniko maming dakeba uamang chanchija aro bi·sarangko orphanage-o ong·gija nok dal·ao dongenga gita chachasa nikna man·skaenga aro ian ua orphanage-ni chu·sokaniba ong·a.
Iani bidingo pamong Marbaniang-ni aganani gita, da·odipet ua an·tangarichin ua orphanage-ko chalaienga, indiba manderang iani gimin social media-o niksoe basakoba giljao bak ra·gipa manderang aro nama-sikaniko on·giparangni ka·sae on·gilanirangkoba man·soenga.
Bang·gija salrangna skang, UNN social group baksa Shillong Marwari community gimik nangrime ua noko dongenggipa bi·sarangna lekkarang, kal·ani bosturang, cha·a-ringani aro ba·ra-kancharangko on·e dakchakangtokaha.
Apsandaken, UNN News-ni sakgni kobor setimgiparang Shushil Dadhich aro Prakash Verma-maangni ua noko dongenggipa bi·sarangni golpoko noksarang baksa social media-o see parakatenba uni giproroangani ja·man ua orphanage-na bang·a manderangkon jakrang snile dakchakna gita didianiko on·skaaha.
