Shillong, Sept 15: HNLC bobil dolni gitcham dilgipa Cheristerfield Thangkhiew-ko so•otgipani bidingo Assembly-ni Session-o jera ra•grikna cholko on•jahani gimin Opposition Congress dolni dilgiparang jinma ong•katgrime katahani gimin talataniko on•angengon, ian da•o inquiry-ni ning•osa ong•engani gimin ua Assembly-ni Rule 59-o pangchake jera ra•grikna gita cholko on•jaha ine Budbar salo Meghalaya Legislative Assembly-ni Speaker Metbah Lyngdoh parakataha.

“Iani bidingo jera ra•grikgenchimoba angani dontongchina aganon membor-rang dontongjawa ine anga ma•sia. Advocate General-ni nangnikaniba Rule 59-o pangchake kan•dikgipa chanchirimaniko dakna on•gijanian ong•a aro ian judiciary-ni ning•osa ong•engani gimin jera ra•grikna gita niam dongja,” ine Lyngdoh talataniko on•angaha.