Shillong, Feb 2: FMSCI Blueband Sports Indian National Rally Championship 2025-ni Round 5 ba bongagipa round, January 31 tariko, Indore songjinmao matchotangaha.
Ia Indian National Rally Championship-o Meghalaya a•dokoni gari salsusagiparangba chu•sokgipa ong•aha aro ia susaanio, Tura-oni Aneesh Sangma, Gypsy Category-o 1st Runner-Up-ko man•e chegipa ong•aha.
Ian Aneesh-ni Indian National Rally Championship-o gittamgipa changna cheaniba ong•aha.
Women’s Category ba me•chikrangni gari salsusaanio, Phoebe Dale Nongrum-ba bak ra•angaha.
Gari salsusaa matchotani ja•man, Aneesh Sangma kobor ra•timgipa manderang baksa agangrikengon, ia chu•sokaniko ua an•tangni sianggipa jong-ada Kamlesh Das sagina pakwatangaha.
Meghalaya a•doko motorsports ba gari gorarangni susaaniko tang•doatna gita rakbee kam ka•engani gimin ua dingtangmancha a•dokni Chief Minister Conrad K Sangma-koba mittelpilangaha.
Uni ia National Car Rally Championship-o bak ra•anio pilak nanga dakchakanirangko on•ahani gimin Aneesh, dingtangmancha Mahendraganj-ni MLA aro Excise Department-ni Adviser Sanjay A Sangma-koba mittelpilangaha.
Ia Indian National Rally Championship-ni bongagipa round matchotahani gimin da•o dokgipa aro bon•kamgipa round-ko re•baenggipa jao Maharashtra a•doko ong•atangskagnok.
