Shillong, May 12: Sana-banani a·bao on·kange aro bimchipe dangdike on·enggipa nurse-rangni mingnamgipa kamrangko mittelpilskaani gita a·gilsakni ki·tik-brichin May jani 12 tariko bilsiantin International Nurses and Midwives Day-ko manirongenga. Ia salan, da·ororo chasongni sana-bananirangko a·bachengatgipa, Florence Nightingale-ni atchiani salko gisik ra·e manianiba ong·jola.

Da·omiting somoio giproroenggipa COVID-19 sabisini a·sel sagiparangko hospital-rangona ra·baanirang batrikrikengon, simarang dongomangba sagipa mande sakanti aro sakprakprakkon nirok-simsakatanio nurse-rang, namen rakgipa kamrangko ka·e dangdike on·tokenga. Sagipana nanggitikgipa simsakataniko nangoba ba bang·gija kattarangchi agan-ku·pattiani ong·oba, nurse-rang somoiantion uamangna dangdike on·na gita tarie dongenga.

Ia International Nurses and Midwives Day-ko maniani salo, Shillong songjinmani mitam hospital-rango dangdike on·enggipa nurse-rang baksa Hub news-ni kobor ra·timgiparangni golpoanganio, saksa nurse-ni aganani gita, ia somoirango corona sabisina maming daken kenjagokna nangja indiba mande sakantian ia sabisina simsakna nanga aro an·ching pilakni ku·monganichi ia giproroenggipa sajinma baksa dakgrikanio chu·sokgipa ong·gen aro sabisini kosako chechongmotgen ine aganenba, mande sakantikon da·omiting noktangtango dongtokchina aroba sajinmani tikako su·e ra·tokchinaba didianiko on·angjolaha.