Shillong, Sept 14: Meghalaya a·dokni Sarva Shiksha Abhiyan (SSA) skulrango skigiparangna jagittamni dormaharangko on·kujaengani gimin Mongolbar salo, Meghalaya Sarva Shiksha Abhiyan Schools Association (MSSASA)-ni gita Shillong songjinmani Malki kal·chakramo jinma asonge jingjengatangtaiaha.
Koborko on·ani gitade, Meghalaya a·dok gimikni sak 12,541 SSA skigiparang, re·anggipa June, July aro August jani dormaharangko man·tokkujaengachim.
Skigiparangni jingjengatani bidingo talataniko on·angengon, 2018 bilsi dipetan a·dokni SSA skigiparang, uamangni dormaharangko somoi gita on·china sorkario dabiengachim indiba ia dabianiko knachakna gisiko nangjaengani gimin sorkarini kosako jegalna gita skigiparang asonge jingjengatangtaiaha ine MSSASA-ni president Aristotle Rymbai parakataha.
Iana agreba a·dokni SSA skigiparangna pay scale-ko ra·gatchina aro dormaharangko bariatchina gitaba association dabiengachim ine Rymbai parakataha.
“RTE Act 2009 aro SSA-RTE-ni dongimin niamrango pangchake SSA skigiparangko state implementation society-oniko a·dokni Education department-o bak ong·atchina chinga sorkario dabienga,” ine Rymbai aganaha.
Indake ong·engon, skigiparangni man·na nangkuenggipa dormaharangko ta·raken on·china gita MSSASA dabiangenba, skigiparangni dabianirangko sorkari, September 30 tarikna skang chu·sokate on·jagenchimode November jao skigiparang, salgnina chutti ra·gope jingjengatskagen ine MSSASA-ni president mikrakataniko on·angaha.
