Guwahati, May 2: Ia chang Assam Assembly Election-oba Assam-ni minister aro BJP-ni dilgipa Himanta Biswa Sarma, Jalukbari constituency-o lak 1-na batgipa vote-rangchi chepiltaiaha. Ua Congress dolni candidate Romen Chandra Borthakur-ko 1,01,911 vote-rangchi chee seokako man•piltaiaha.
“Joljol bongagipa changna Jalukbari constituency-ko dilna anga cholko man•taiengani gimin kusi ong•a. Angni cheanina anga Jalukbari-ni manderangko, PM Narendra Modi-ko, Home Minister Amit Shah-ko aro BJP-ni national president JP Nadda-koba mittelpilna ska,” ine election-o cheani ja•man Himanta Biswa Sarma parakataha.
Assam election-ni result-ko parakatani ja•man kusi ong•e manianirangko dakjachina gitaba ua BJP-na kam ka•giparangko aro an•tangna chakpagipa manderangko didiataha.
“An•chingni gisepo COVID-19 giproroengani gimin election-ni result-ko parakatani ja•man jinma kusi ong•e manianirangko dakjachina anga mol•molenga. Ia sabisiko warachakna gita an•chingni PM Narendra Modi-ba mikkango donge kamko ka•dilenga,” ine Sarma parakataha.
2001 bilsionin Sarma, Jalukbari constituency-ni MLA ong•e manderangko dilbaengahachim aro 2016 bilsini Assam election-oba ua 85,935 vote-rangchi Jalukbari seat-ko cheahachim.
Indake ong•engon, Assam-ni Chief Minister Sarbananda Sonowal-ba Majuli constituency-oni seokako man•taiaha.
“Da•oba pu•onanirangko chanani matchotsrangkujaenga indiba ia changoba BJP dol, sorkariko rikpiltaigen. Manderangni bakrimanichisa ia pilakan chu•sokgipa ong•aha,” ine Sonowal parakatskaaha.
Election Commission-ni website-o parakani gitade, Assam-o BJP-chi dilenggipa NDA, ge 77 seat-rangko man•e chegipa ong•enga aro Congress dolni dilenggipa ‘Grand Alliance’ ge 40 seat-rangko cheskaengachim. Assam Assembly-o gimik sak 126 membor-rang donga aro sorkariko chalaina gita dam 64 seat-rangkosan nangaiachim.
