Shillong, Nov 17: Meghalaya sorkarini Meghalaya State Skill Development Society (MSSDS), Labour Department aro Employment & Skill Development-ni ong•atenggipa Japanese Language Training Program-ko Sombar salo, Meghalaya a•dokni Chief Minister Conrad K Sangma, Shillong songjinmani Barik-o donggipa Mount View Building-o a•bachengate on•angaha.
Ia training program-ko a•bachengatanio, a•dokni Labour Minister Methodius Dkhar, Asean Group Co Ltd-ni Chairman aro CEO Nishikwa Toshiaki San, Japanese ku•sikko skigiparang aro MSSDS-ni official-rangba dongpae bak ra•angaha.
Ia Japanese Language Training program-ko a•bachengatanio, a•dokni Chief Minister, program-o bak ra•giparangna aganprakangengon, dingtang dingtang kamni a•bao Meghalaya sorkari, Japan a•song baksa bakrime kamrangko ka•enga ine parakatenba, Japan aro salgro salaram a•dokrangni gisepo cha•ani ringani aro dakbewal rikbewalrang apsananga ine aganaha.
Japan a•song baksa bakrime kamrangko ka•engani gimin janapangkuengon, bilsignina skangde a•dokni nurse sakgnikosan Japan a•songona watatkuengachim indiba da•alo sak 37 nurse-rang Japan a•songo kam ka•engaha aro re•baenggipa jarango gipinrangba Japan a•songona re•ange kamrangko ka•na siengkua ine Chief Minister aganaha.
Japan a•songo kam ka•enggipa a•dokni nurse-rang, N4 Grading-o kam ka•engani gimin bang•bate dormaharangko man•na gita N3 Grade-o kam ka•china sorkari nangnikenga ine janapatskaengon, ia nurse-rang an•tangtangni nokdangrangna gong lak 1-mangni gita tangkarangko watatna man•enga ine Sangma aganaha.
Janggi tangani cholrangko dake ra•nasan ong•aigija kamrangko skie ra•china gitaba a•dok sorkari, a•dokni chadamberangko Japan a•songona watatna gita cholrangko on•na nangnikenga ineba ua aganaha.
Japan a•songo kam ka•enggipa sak 37 nurse-rang, Bangalore-o jadokna training-ko ra•chengna nangaha ine janapatskaengon, da•alo ia training-ko ra•enggipa manderangde Shillong-on skie ra•na man•engani gimin namen rasong gnanggiparang ong•a ine Chief Minister parakataha.
Japan a•songoni skigipa sakgnina rimchaksoani kattarangko aganangengon, uamangni donganio dingtang dingtang neng•nikanirangko chagrongna nanggenchimoba, uamangna dongtoaniko on•na gita a•dok sorkari aro Meghalaya a•dokni manderang jotton ka•gen ine Chief Minister ku•rachakaniko on•angaha.
Ia jadokna ong•atenggipa Japanese Language Training Program-o sak 86 chatro chatrirang, biming segatenba skie ra•enga.
Na·simang iakoba nina man·gen:
Na·simang iakoba poraina man·gen: AMCH, Open-heart Surgery ka·anio chu·soka
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
