Shillong, Feb 15: Meghalaya a·doko aro mongsongbate Khasi Hills a·jani dingtang dingtang biaprango para salenggipa garirang, petrol aro diesel-rangni dam tang·doaniko jegale para salaniko dontonge jingjengatengani a·sel ramram manderangsa neng·nikanirangko chagrongna nangtokengani gimin jingjengatenggipa dolrangko okame agangrikchina gita Khun Hynniewtrep National Awakening Movement (KHNAM) state youth wing-ni dilgiparang, a·dok sorkario dabiangaha.
Khasi Hills a·jao aro mongsongbate Shillong songjinmao taxi salenggipa garirang, petrol aro diesel-ni dam tang·doenganiko jegale gari salruraaniko dontongatengani a·sel re·ruraenggipa manderang neng·nikanirangko chagrongna nangtokengahachim.
Indake ong·engon, manderangni neng·nikanirangko namatna man·na gita a·dok sorkari, ta·raken jingjengatenggipa dolrangko agangrikna okamna nanga ine KHNAM state youth wing-ni president Thomas Passah parakataha.
Para salenggipa garirangni nangnikanirangko niatengon, manderangko salruraenggipa garirangni nangana bate para ra·aniko, garirango nangana bate manderangko gatengani a·sel manderang aro mongsongbate me·chikrang neng·nikanirangko man·na nangengani gimin aro para salenggipa garirango manderangni naljokanina niamrangko ra·gatskachina gitaba KHNAM state youth wing, a·dok sorkariko didiangaha.
Passah-ni parakatani gitade, da·ororo para salenggipa garirangko dontongate jingjengatengani a·sel chatro chatrirang, game ge·e cha·giparang aro ramram manderangsa neng·nikanirangko chagrongna nangbatengachim.
Petrol aro diesel-rangni dam rakbatroroengani gimin jegale aro para salenggipa garirangoniko sorkarini ra·enggipa kajinako komiatchina dabie Meghalaya Joint Action Committee of Commercial Vehicles (MJACCV) baksana dingtang dingtang gari para salgipa dolrang, Khasi Hills a·jao aro mongsongbate Shillong songjinmao para salruraaniko dontongate jingjengatengachim ine nikna man·a.
