Shillong, Sept 24: Meghalaya a•dokni dingtang dingtang songrango Jal Jeevan Mission (JJM)-ni kamrangna Jal Shakti Ministry-ni chamatgipa tangka paisarang chu•ongjaengani gimin Meghalaya sorkari, ma•mong sorkarioniko tangka paisarangko bi•dapataha.
Iani bidingo Meghalaya a•dokni PHE Minister Renikton Lyngdoh Tongkhar, Sukrobar salo parakataha.
“JJM-ni kamrangna chamatgipa tangka paisarang chu•ongjaengani gimin re•anggipa September-ni 16 tariko salgro salaram a•dokrangni PHE minister-rang baksa Guwahati-o tom•anio anga iani bidingo Union Jal Shakti Minister Gajendra Shekhawat-na janapataha,” ine Sukrobar salo, Tongkhar parakataha.
Tongkhar-ni parakatani gitade, ma•mong sorkarini chamatgipa tangka paisarangchi a•dokni bang•a songrangon nokdang ge•antiona chirangko sale on•na chu•ongjaengachim.
Mitam songrangode chel•begipa biaprangonikosa chirangko salbana nangengani gimin ma•mong sorkarini chamatgipa tangka paisarangchi a•dokni pilak songrangnade kamrangko matchotatna man•jaenga ineba PHE Minister parakataha.
Indake ong•engon, je songrangnan tangka paisarangko nangdapengachim, uandakgipa songrangna nanga gita sakkirangko mesokchina gita Union Minister, uamangko didiatskaaha ineba Tongkhar parakataha.
“Ma•mong sorkarioniko tangka paisarangko man•dapna gita je songrangon JJM-ni tangkarang chu•ongjaengachim, uandakgipa songrangko biming segatchina anga pilak engineer-rangnan ge•etaniko on•manaha,” ine Tongkhar aganaha.
