Shillong, Jun 17: Shillong-Dawki Four Lane National Highway-ko tarianio kamrang ka•sinengani a•sel Umshyrpi dolongoni Upper Shillong-ona dakanggipa ramao gari gorarang apchangket ong•atako man•e manderang neng•nikanirangko chagrongna nangtokengani gimin Upper Shillong jolo donggipa dingtang dingtang songni dilgiparang, National Highways & Infrastructure Development Corporation Limited (NHIDCL)-ko matnangataha.
Mongolbar salo, Synjuk Nongsynshar Shnong Upper Shillong (SNSUP), sorkari official-rang baksa Umshyrpi dolongoni Upper Shillong-o donggipa 3rd Mile-ona rama tarianiko nina re•angon, kamrang ka•sinengani gimin dingtang dingtang songni dilgiparang aro sorkari official-rangba, an•tangtangni suk ong•gijaniko paraktokaha.
Ia rama tarianiko nieanio Mylliem C&RD Block-ni Block Development Officer (BDO) Tosanba Marwein, kobor ra•timgipa manderang baksa agangrikengon, rama tariengani a•sel Umshyrpi dolong sokna skang gari gorarang apchangket ong•na nange, Shillong-chipakna re•angenggipa manderang adita somoirangna jachange dongna nangtokenga ine parakataha.
Biap damgnio gari gorarang apchangket ong•batna nangengani gimin ia biaprango nanga gita ja•kurangko de•na NHIDCL-ni official-rang ku•rachakaniko on•ataha ineba Marwein aganaha.
Kamrangko ka•anio Block office, PHE aro songni dilgiparang, NHIDCL-na pilak nanga dakchakanirangko on•gen ineba ua ku•rachakaniko on•angaha.
Kamrang ka•sinengani a•sel manderang neng•nikanirangko chagrongna nangtokenga ine SNSUP-ni advisor Daniel M Thangkhiew-ba janapatengon, kamrang mongsongbate Umshyrpi jolrango ka•sinengani gimin uamang NHIDCL-ni kamo suk ong•nikjaha indiba kamrangko ka•anio NHIDCL neng•nikanirangko chagrongna nangengani gimin uamang, NHIDCL-na pilak nanga dakchakanirangko on•na ku•rachakaha ine parakataha.
Thangkhiew-ni aganani gitade, ia ramako tarianichi Upper Shillong jolrango songdongenggipa manderangsan neng•nikanirangko chagrongna nangenga ong•ja indiba ia ramara, West Khasi Hills, Sohra, Pynursla aro Garo Hills-onaba dakanggipa rama ong•ani gimin pilakan neng•nikanirangko chagrongna nangtokenga.
3rd Mile-oni Umshyrpi-ona kamrangko antignini gisepon matchotatna NHIDCL ku•rachakaniko on•ataha ineba Thangkhiew aganaha.
Na·simang ia video-koba nina man·gen:
Na·simang iakoba poraina man·gen: MSPB, a·doko lekka porani gadangko namdapatna pilakkon apsan kam ka·rimaniko nangnika
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
