Shillong, May 26: Shillong songjinmao chu•gimik lockdown-ko ra•gatani sal 26 gapengahani a•sel manderang aro mongsongbate kangal cholgrirang neng•nikanirangko chagrongna nangtokengahani gimin Budbar salo, Bongo-Bhasi Mahasabha Unit Shillong (BBMUS)-ni manderang, Jail Road jolrango songdongenggipa kangal cholgrirangna cha•ani ringani bosturangko suale on•angaha.

East Khasi Hills a•jao COVID-19 ta•raken batrikrikengahani gimin sabisini batrikrikaniko champengna gita ia ja a•bachengaonin re•baenggipa June 1 tarikona kingking chu•gimik lockdown-ko ra•gatahachim ine nikna man•a.

Lockdown-ko ra•gatanio chol ong•pagipa manderangde an•tangtangni nanga bosturangko bree cha•pana man•engoba salo hajira ka•e aro chonchongipa dokkanrangko dake cha•paenggipa manderangde tangka paisa kamaiani cholrang dongjae bang•e neng•nikanirangko chagrongna nangtokskaengahani gimin Budbar salo BBMUS-ni manderang Jail Road jolrango donggipa kangal cholgrirangna ma•manti cha•ani ringani bosturangko suale on•angaha.