Guwahati, Oct 19: Adita salrangna skang West Karbi Anglong-ni Tapat (jekon Lapangngap ineba minga) sima ari-o kajia-golmalrang ong·anichi saksa mandeni janggi galani ja·mano, tom·tomaniko rakkina aro silroro-namroroani cholrangko ra·bana kam ka·gen ine Assam-ni Skotong Minister Dr. Himanta Biswa Sarma ku·chakangaha.
Police-rangni nirokanichi, Lapangap-o songdonggipa manderang a·paltangtangni mi-rangko chimongengachim. Unon Karbi-rangoni dolsa manderang re·bae kajia-golmalrang a·bachengaha aro uno mande saksa siaona sokaha.
Sianggipa mande Tapat songoni Sarpang Eh Timung-ni depante bilsi 45 ong·gipa Orivel Timung minggipa Karbi mande ong·achim. Unbaksana, adita sak police-rang aro songni manderang mata-buaniko man·aha.
Adita Karbi chatro-chatrirang aro chadambe dolrangni memorandum on·ani ja·mano skotong minister sima ari jolrango tom·tomaniko ra·bana aro janggi tangani gadangrangko namdapatna cholrangko on·gen ine parakatangaha.
Uandake, kajia golmal-rangko champengna aro manderangna naljokaniko on·na inenba Tapat/Lapangngap-o battalion camp-ko dongkamatgen ine Sarma aganangaha. Sianggipa Oriwel Timung-ni nokdangni manderang-ni jako gong lak 10 tangkarangko on·gen aro Karbi Anglong Autonomous Council-ni (KAAC) ning·o janggi tangani cholko on·gen ine ua aganangaha.
November 17, 1951-ni Government Notification-o pangchake sima ari-o krongrangko songgen, aro uandake West Karbi Anglong-ni Block I aro II, KAAC-ni ning·on ong·a aro ong·angkugen ineba skotong minister parakatangaha.
Iarangna agreba, sima ari jolrango sanna-banani, poraia-skiani aro janggi tangani gadangrangko namdapatani bang·a cholrangkoba on·anggen ine Sarma parakatangaha. Ua an·tangan November ja-o Tapat/Lapangngap-ona re·ange obostarangko nirokegen ineba aganangaha.
Karbi dolrangni dilgiparang skotong minister baksa tom·aniko chu·sokgipa aro ka·donganiko on·gipa ong·aha ine parakatenba, sima ari jolrango kajia-golmalrangko champengna aro silroro-namroroani cholrangko ra·bana sorkarini kang·kare kaaniko kusi ong·en ra·chaksoaha.
“Assam-ni jatrangni chu·gimik namroro-silroroanian chingni skanggipa dakna nanggni kam ong·a. Chinga uamangni namroro-silroroani aro ru·uta salrangoni chagrongenggipa neng·nikanirangko namatna on·kange kamrangko ka·gen. Chingni dingtang dingtang jatrangni janggi tangani bewalrang chingko nokdangsan gita bakrimata,” ine Karbi aro Adivasi jatrangni manderang baksa tom·ani ja·mano Sarma parakataha.
Skotong minister-ko grongegipa dolrangara Karbi Students’ Association (KSA), Joint Action Committee for Autonomous State (JACAS), Karbi Youth Association (KYA), Karbi Farmers Association (KFA), Karbi Unemployed Youth Association (KUYA), Karbi Students’ & Youth Council (KSYC) aro Karbi Anglong Women Justice Forum-ni (KAWJF) manderang ong·a.
Na·simang iakoba nina man·gen:
Na·simang iakoba poraina man·gen: Zubeen sagini siani ja·mano Assam-o Diwali manina koros ka·anirang komibata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
