Shillong, Jul 7: Mongolbar salo, Meghalaya a•dokni Chief Minister Conrad K Sangma, Union Coal & Mines Minister G Kishan Reddy-ko New Delhi-o grongenba, a•doko koela bikotani mining plan-rangko ra•chakna Mines & Minerals (Development & Regulation) Act 1957-ni Section 26 ning•o dingtangmancha a•dokna bilko on•china gita India sorkariko didiangaha.
Union Minister-ko grongeanio Chief Minister baksana East Jaintia Hills a•jao donggipa Sutnga Saipung constituency-ni MLA Santa Mary Shylla-ba dongpaaha.
Chief Minister-ni u•iatani gitade, a•doko koela bikotani mining plan-rangko ra•chakna India sorkari, a•dokna bilko on•genchimode, a•doko hajalni hajal koela bikote cha•enggipa Tribal manderang, koelarangko bikotna gita maming neng•nikani gri a•doktangon kamrangko matchotna man•aigenchim.
Meghalaya a•doko dakbewal rikbewalrangko talate on•angengon, Meghalaya a•dokara Sixth Schedule a•doksa ong•e, a•arang aro a•ningo donggipa pilak gam-jinrangan a•dokni ong•ja indiba a•nokgipa, Mahari aro jatni gam-jinrangsa ong•a aro iako 2019 bilsio Supreme Court-ba rai on•aha ine Chief Minister parakataha.
Meghalaya a•doko man•gipa koelarangara ba•gipasa aro pripraesa dongani gimin a•songni gipin biaprango man•gipa koelarang gita ong•jae koelarangko nokdang aro maharirangsa jako ra•a ine janapatengon, iani giminsa Meghalaya a•dokode koelarangko bikotanio a•songni niamrangko ja•rikna melija ine Chief Minister aganaha.
Meghalaya a•doko mese a•kol gita koela bikotaniko 2014 bilsion National Green Tribunal (NGT) champengatahani a•sel, koela bikotanio pangchake janggi tangenggipa bang•a nokdangrangan kamgri ong•na gita nangtokaha aro a•dokba kajina man•dapanio bang•en noksan ong•na nangaha ineba Chief Minister aganaha.
Ministry-ni ku•pattianio pangchake koelarangko bikotna komibeoba biaprang hectare 100 ong•na nanggen ine Standard Operating Procedure (SOP) ba niamko donanichi a•doko bang•en koela a•dam nokgiparangko watchanggalaha maina Meghalaya a•dokode apalgipa koela a•damrang bang•breja aro mande saksanchide koela a•damrangko a•kangja ineba Chief Minister parakataha. Chonchongipa koela a•damrangko chalaina gita changni chang Delhi-ona aro Kolkata-ni Indian Bureau of Mines office-ona re•ruraaniara koros amsokgijani ong•a ineba ua aganaha.
Meghalaya a•dokna niamrangko olgrokatchina gita mol•molaniko 2015 bilsion Coal Ministry ra•chakahachim ine janapatengon, Mineral Concession Rules, 1960 aro Mineral Conservation & Development Rules, 2017-ni ning•o chapgimin bilrang baksa a•dokna bilrangko on•e, Section 26-ni ning•o u•iataniko on•enba, ia kamko matchotatchina gita Chief Minister, ma•mong sorkariko mol•molangaha.
Iani bidingo name nipilna gita committee-ko songchina Union Minister ku•pattianiko on•angaha aro uni ku•pattianiko a•dokni Chief Minister-ba ra•chakangaha.
Meghalaya a•doko koela bikote cha•enggipa manderangni namgnina somoiko on•e uamangni agananirangko gisiko nange knatimahani giminba Chief Minister, Union Coal & Mines Minister-ko mittelpilangaha.
Na·simang iakoba nina man·gen:
Na·simang iakoba poraina man·gen: Chang 11-gipa State Shooting Championship-o NGH-ba gechet medal-rangko chea
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
