Kokrajhar, Mar 25: Assam Legislative Assembly election-o Kokrajhar constituency-oni Bodoland People’s Front (BPF)-ni candidate ong•e susaenggipa Sewli Mohilary-o ge 37 bank account-rang aro bol 16 tipper truck baksana bol 4 tractor-rangko man•chape gimik bol 32 garirang donga ine ma•sina man•aha. Uan Assam-o BJP baksa bakrimenggipa BPF dolni aro Bodoland Territorial Council (BTC)-ni dilgipa Hagrama Mohilary-ni jikgipa ong•a.
Candidate-ni affidavit ka•ani gitade, uo gong crore 54.4-ni gam-jinrang donga aro ian uni ge 37 bank account-rango donggipa gong crore 5.26 tangkarang aro gong crore 12-na batgipa garirangkoba man•chapa.
Mohilary-ni apjitna man•gipa gam-jinrangara gong crore 12.59-ni ostrorang ong•a aro uni apjitna man•gijagipa gam-jinrangara, gong crore 20.03-ni bagan barirang aro nok-jamrang ong•skaa.
Uni segipaode ge 8 bank account-rang aro dam rakgipani SUV gari dongskaa aro uni chu•gimik gam-jinrangara, gong crore 9.17 ong•skaa.
Gam-jinrangko tosusagenchimode Mohilary-na bate All India United Democratic Front (AIUDF)-ni dilgipa Mohammed Badruddin Ajmal man•e cha•batskaa maina uni affidavit-o ua an•tangni chu•gimik gam-jinko gong crore 222.34 ong•a ine parakaha.
Ia Assam Assembly election-o bilsi 70 ong•gipa Ajmal-an man•e cha•batgipa candidate-ba ong•enga.
Perfume badinggipa Ajmal-o ge 8 bank account-rang donga aro ia bank account-rango gimik gong crore 52.43 tangkarang donga. Uni affidavit-o parakani gitade, uo gari boldok donga aro uni jikgipa Rizwana Badruddin Ajmal-o gari bolgittam dongskaa. Ia garirangni damara gimik gong crore 2.17 ong•a.
Indake ong•engon, Assam a•dokni Chief Minister aro Jalukbari constituency-ni BJP candidate Himanta Biswa Sarma aro uni jikgipa Riniki Bhuyan Sarma-ni gam-jinrang, 2021 bilsio gong crore 17.27 ong•aoni da•o ia 2026 bilsio gong crore 35.16-ona tang•doangskaaha.
Na·simang iakoba nina man·gen:
Na·simang iakoba poraina man·gen: M’laya sorkari GHADC-na dingtang electoral roll-ko tarianggen : Tynsong
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
