Williamnagar, Sept 17: Krishi Vigyan Kendra, East Garo Hills September 17 tariko Nutri Garden aro Tree Plantation ba Namgipa me⋅su samjak aro bol ge⋅ani namgnini bidingo manderangna ui⋅atna program-ko ong⋅atangaha. Ia program-o East Garo Hills-ni Deputy Commissioner Pa Swabnil Tembe mongsonggipa sokgipa ong⋅e, noksam nokgilo me⋅su samjakko ge⋅aniara, chu⋅onge cha⋅aniko man⋅an baksa an⋅chi chu⋅onggijani sabisi-ko dakgrikchakna namgipa ja⋅ku ong⋅enga ine aganaha. Garo Hills-ni songadamrango me⋅chikrangni siani 70% -de ian an⋅chi chu⋅onggijaon ong⋅rongbata ineba ua agandapaha.

Gipin gipin Department-rang jedake DAO, DHO aro ICDS-rangba be⋅en an⋅china namgipa bolan bite aro me⋅su samjakrangni gimin aganan baksa iarangko altue man⋅a amna gita noksam nokgilo bari tarie ge⋅china bitchil aro chararangko suale on⋅angaha. Re⋅baenggipa 2023 bilsi-ko International Year of Millet ine parakatna miksongsoenganiko aganan baksa uni be⋅enna namgni ong⋅ani bidingo agane iako bang⋅bate ge⋅aniko dakchina didiangaha.

Apsan somoion KVK-chi skiatako man⋅gimin Local Kama Self Help Group-ni misi ko gur-ming tarianikoba mesokangjolaha. Dragon Fruit aro Longan biterangni be⋅enna namgni ong⋅aniko nike uarangko ge⋅china on⋅atan baksa office-ni sambeng ketchirangoba ge⋅tokaha.