Shillong, Nov 21: Bongagipa changna Shillong songjinmani Ward’s Lake-o ong•atenggipa Literary Festival-ni gnigipa salo, a•dokni Chief Minister Conrad K Sangma-ba bak ra•angaha aro ia tom•anio ua jinmana aganprakengon, ia Literary Festival-ko ong•atanichi a•doko sena jotna gisik nanggipa manderangba, an•tangtangni changa sapanirangko mesokpana cholko man•engaha ine parakataha.
Ia Literary Festival-ko chonbegipa tom•bimongaoni da•o dal•begipa maniani ong•atna man•aha ine an•tangni kusi ong•aniko parakatengon, a•doko sena jotna gisik nanggipa manderang, an•tangtangni golporangko manderangna u•iatna sikgenchimoba skango iandakgipa cholrangko man•pajachim indiba da•alo ia Literary Festival-ko ong•atanichi sena jotna gisiko nanggipa manderang, namgipa cholko man•engaha ine Chief Minister aganaha.
A•dokni chadamberangko, sea jotanio gisik nangchina didina gita a•dok sorkari, sea jotanio mingsinggipa manderangko aro ki•tap serakgipa manderangko gipin biaprangoniko a•dokona rimbaenga ineba Chief Minister aganaha.
Meghalaya a•doko manderangna janggi tangani cholrangko on•na gitasa iandakgipa program-rangko ong•atenga ine talataniko on•angengon, Shillong songjinmako ‘rock capital’ inesan mingsingaigija kal•susaani aro sea jotanirangoba tang•doatna gita a•dok sorkari kang•kare kae kam ka•enga ine Sangma aganaha.
A•doko dingtang dingtang program-rangko ong•atanichi tangka paisani gita man•dapanirangko janapatengon, 2024 bilsini gisepo changbongana dal•dalgipa concert-rangko ong•atanichi gong crore 133-mangni gita tangka paisarangko man•dapaha aro ia concert-rangko ong•atanichi, homestay-rangko chalaienggiparang, taxi salgiparang aro dingtang dingtang bading chiwalanirangko dake cha•enggipa manderangba bang•en namgnirangko man•aha ine Chief Minister parakataha.
Shillong songjinmao mingsinggipa Ward’s Lake-ko nambate aro nitobate taridapna gita a•dok sorkari, gong crore 50 tangkarangko chamataha ineba ia tom•anio Chief Minister parakataha.
Ia tom•anio a•dokni Tourism Minister Timothy D Shira-ba aganprakengon, iandakgipa program-rangko ong•atanichi cha•ani ringani, dongchakani aro uandake bading chiwalgiparangko tang•doatan baksana tourism-ko tang•doatna dakchakaha ine aganaha.
Ia Literary Festival-ara, sea jotaniosan ong•aigija, doka dam•ani, jatni daka rikani aro cha•ani ringanirangko mesokani cholba ong•enga ineba Shira aganaha.
Na·simang iakoba nina man·gen:
Na·simang iakoba poraina man·gen: Tura-o Bilgaro X 2025-ko a•bachengata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
