Tura, Jan 8: Garo Hills-o ra·gate ka·enggipa ma·mong sorkarini dingtang dingtang project-rangko nipilna gita Sonibar salo, Minority Affairs-ni Union Minister of State John Barla, dingtang dingtang department-ni officer-rang baksa Tura-ni Circuit House-o tom·aniko ong·atangaha.
Ia tom·anio dingtang dingtang department-ni officer-rang baksa tom·e chanchirimangengon, jolo songdongenggipa manderangni namgnina ma·mong sorkarini ra·gatgipa dingtang dingtang scheme-rangni bidingo manderangna u·iataniko on·china gita Union Minister John Barla, officer-rangko didiangaha.
Jolo namroro silroroaniko ra·bana aro manderangni janggi tanganio dingtanganiko ra·bana gita nambate kamrangko ka·chinaba ua officer-rangko didiangaha.
Manderangni namgnina India sorkari, dingtang dingtang scheme-rangko ra·gate on·enga ine janapatengon, chonchongipa jatrangna scheme-rangan bang·en donggenchimoba manderang ia scheme-rangko ra·na changtokjaenga ine ua, manderangna ia scheme-rangko ra·anio dakchake on·china officer-rangko didiangaha.
Iana skang, West Garo Hills a·jani Deputy Commissioner Swapnil Tembe-ba jinma chanchirimanio bakko ra·angengon, West Garo Hills a·jao ra·gate ka·enggipa Jal Jeevan Mission, Aadhar aro uandakgipa dingtang dingtang scheme-rangni bidingo Union Minister-na talate on·angaha. Ia tom·anio, PMGSY, PMAY, Amrit Sarovar aro uandakgipa scheme-rangni bidingo West Garo Hills DRDA-ni Project Director Dolrich Berin G Momin, Union Minister-na talate on·angskaaha.
