Shillong, Jul 6: Foreign Contribution (Regulation) Act (FCRA)-ko taridapna miksongenggipara, gipin a•songrangni on•gilanirango ma•mong sorkarini niamko ra•gatanisan ong•jaenga indiba ian a•songni dingtang dingtang biaprango mondolirangni, hajalni hajal skulrangko, hospital-rangko aro social welfare organization-rangko chalaianioba nangchakeaniko ra•bana sienga.
Iani bidingo Robibar salosan, Meghalaya a•dokni Chief Minister Conrad K Sangma, a•dokni dingtang dingtang mondolirangko dilenggipa manderang baksa, Union Home Minister Amit Shah-ko New Delhi-o grongenba chanchirimangaha aro ia FCRA-ko taridapanio, Meghalaya a•doko maikai dingtang dingtang mondolirang, skulrangko, hospital-rangko aro songsalna dangdike on•gipa dolrangko chalaienga, uarangni giminba niatchina gita didiangaha.
Union Home Minister-ko gronganio a•dokni Chief Minister baksa North East India Christian Council (NEICC), Presbyterian Church of India, Garo Baptist Convention aro Shillong-ni Roman Catholic Archdiocese-ni dilgiparangba dongpaaha. Ia dilgiparang, Union Home Minister-ko gronge agangrikengon, FCRA-ko taridapna nanggenchimode, Meghalaya a•doko, mongsongbate songadam nokadamrango aro Tribal biaprango maikai mongsonggipa skulrangko, hospital-rangko aro songsalna dangdike on•gipa dolrangko Kristian mondolirang chalaiengachim, uarangkoba niroke tarichina didiangaha.
Ia bilsio Foreign Contribution (Regulation) Amendment Bill, 2026-ko Parliament-o parakatani ja•man, FCRA Amendment Rules 2026-ko June jao u•iatani ja•man India a•songo dingtang dingtang skulrangko, hospital-rangko aro songsalna dangdike on•gipa dolrangko chalaienggipa Kristian mondolirangni gisepo jajrengchakani ong•kataha. Skangode, gipin a•songrangni dakchake on•atenggipa tangka paisarangko man•soani aro jakkalaninasa niamrangko tariachim indiba da•o FCRA-ko taridapaniode, gam-jinrangko chalaiani, institute-rangko nirok sandiani aro uandakgipa kamrangnaba dingtangmancha niamrangko tariahani gimin Kristian mondolirangni gisepo jajrengchakani ong•kataha.
Kristian mondolirangni jegalenggipa mingsa niamde, Designated Authority-ko bikotanian ong•a maina ia niamni ning•o, je organization ba dolni FCRA registration-kon den•galaha, on•pilaha ba gital dake taripilgija donchipaha, uandakgipa dolna gipin a•songoni on•gilanirang baksana ia tangka paisarangchi tarigipa gam-jinrangko sorkarini songe on•gipa Designated Authority-ni nirokanio donskana nanggnok. FCRA registration-ko somoi gita taripiljagenchimode, ia gam-jinrangko sorkarini songe on•gipa Designated Authority-ni ning•o donkamgnok aro unode ia gam-jinrangko sorkarini agency-rangona ra•jitna ba jinmani namgnina jakkalna gita pale galskana man•gnok.
Ia niamara, gipin a•songrangoni on•gilatgipa tangka paisarangchi, an•tangtang tangka paisarangko gilanichi aro manderangni dakchakanichi ru•uta bilsirangna rikgimin skul, college, hospital, hostel aro welfare centre-rangko chalaienggipa mondolirangna gimaani ong•gnok.
Meghalaya a•dokoba Kristian mondolirang, bang•en skul-college-rangko, hospital-rangko aro songsalni namgnina kam ka•enggipa dolrangko chalaiengani gimin iandakgipa niamko ra•gataniara, iandake Kristian mondolirangni chalaienggipa institute-rango pangchakenggipa hajalni hajal chatro chatrirangna, sagipa manderangna aro cholgri ong•gipa manderangnaba bang•en nangchakeaniko ra•baani cholrang donga aro iani giminsa Robibar salo, a•dokoni re•anggipa Kristian mondolirang, Union Home Minister-ko grongenba, ia niamrangko taridapna Meghalaya a•doko ja•rikbaenggipa bewalrangkoba nipilchengchina mol•molangaha.
Na·simang iakoba nina man·gen:
Na·simang iakoba poraina man·gen: Garo Labour Corps Cenotaph-ko rikani 90% matchotaha
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
