Boko, April 16: Ri-Bhoi a·jani Nongpoh-oni kilometer dok chel·ao Marngar minggipa biap donga jean manderangni daka-rikani bewalrangna namen mingsinga. Ia jolo Assamese ku·sikko agangipa song damchikkungna baten donga, aro Guwahati-oni kilometer 50-san chel·ao ong·genchimoba, a·dokni politics aro songsalni dingtang dingtang obostarangoni chel·e donga. Iano songdonggiparang mongsongbate Karbi aro Tiwa jatni manderang ong·a, uamang an·tangtangko “Marngali” ine dona aro uamang Assamese dakbewalrangko ripinge tom·tome janggi tanggiparang ong·a.
Marngar jolo Borgang, Nalapara, Nonga Gaon, Puran Gaon, Lalumpam, Joy Gaon, Borkuchi, Borkhat, Chai, Charikuchi, Aro Athgaon songrang donga. Ua jolo silroro-namroroaniko ra·bana krengenggipa, kamoni neng·takgimin electrical engineer Monin Raj-ni aganani gitade, Marngar-ni manderang Assam-oni adita chel·ao donggenchimoba Assamese sea-jotani aro daka-rikani bewalrangko gisik nangen ripingaha.
Iandakgipa dakbewalrangoni mingsara community fishing festival ong·a, jekon uamang “Hulao Mara Festival” ine minga. Ia bilsianti ong·atgipa tom·bimonganiko Marngar-ni bijangchio donggipa nitobegipa “Kucho Khua Ban” wario ong·atronga. Bohag Bihu-ko maniani somoio, songni manderang na·tok rim·ani dingtang dingtang ostrorang jekai jakoi, khaloi, polo, sepa, khokha aro jal-rangko ra·enba jinma na·tok rim·na re·a. Bang·a me·asarang, me·chikrang aro bi·sarang chiona ong·one na·tok rim·anichi wario namen an·saoaniko nikna man·ronga.
Ia bilsioba ia manianiko namen an·saobee dakangaha. Pringwalonin manderang na·tok rim·nasan ong·aija indiba mandeskarangni na·tok rim·anirangko nina ine wariona jinma jinma tom·tokaha. Wari rikamrango manderang damsan bakrime aro an·senge-katchae rotokaha. Batanggimin bilsirangna batede na·tokrang komigenchimoba, manderangni ku·cholsan ong·anide apsanaingkua. Badiaba bak ra·giparangde jakrara re·angpilgenchimoba, gipinrang jatni chrok-mesaani aro git ring·anirangko dake Bohag Bihu-ko kusi ong·bee maniangaha.
Marngar-o na·tok rim·aniko indake manianiara jatni daka-rikani, ong·telaigipa samtangtangni aro manderangni nangrimaniko tangmesokgipa ong·a. Ian na·tok rim·anisan ong·aija indiba manderangni an·tangtangni nama bimungko, bilakaniko aro jattangni dakbewalrangna rasong chaanirangko maniani ong·a.
Na·simang iakoba nina man·gen:
Na·simang iakoba poraina man·gen: Tura-o Science & Maths Exhibition-ko ong•ata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
