Shillong, March 17: Meghalaya Energy Corporation Limited (MeECL), an·tangna lapko man·na gita aro a·dokni manderangna bijoliko watanio nambate dangdike on·na man·na gita a·dok sorkari chol-ramako sandienba kamko ka·gen ine a·dokni Power minister Pa Abu Taher Mondal, Bristibar salo aganangaha.
Koborni manderangna aganangengon, MeECL-ko nambate chalaiani gimin dingtang dingtang committee-rangni on·gipa chanchianirang aro agan-ku·pattianirangkoba sorkari poraie nianggen ine aganenba, corporation-ko nambate chalaina gita nanga ong·ode gipin dolrangna ba sorkari enterprise-rangna chinga bilko on·gen, unbaksana, skotong minister-onin MeECL-ko chalaianio namdapatani gimin su·dodoanide dongaigen ineba Pa Mondal parakataha.
Power department-ni a·gipi official-rang baksa tom·e nipiltaianiko dakani ja·man koborna u·iatangengon, a·doko bijolini a·bako gital daktaienba mikkangchi nambate chalaiani gimin mongsongbate sorkari kamko ka·gen ine parakatan baksa, a·doko bijoliko chalaianio pilak man·anirango, distribution, transmission aro generation-ming chaprimgija MeECL-ko dingtangatani a·selara ge·sa-ge·gipino pangchakgrikna nangjana gita ong·a ineba minister u·iatjolaha.
“Corporation-o laprangko man·na gitade bang·en kamrangko ka·na nangenga aro iako bakbak man·jagenoba, department-na chinga nisanko done kamrangko ka·chakatna nanggen,” ine Pa Mondal aganangkuaha.
Skangni salrango Meghalaya a·doko bijoliko man·anirang agitchapilani gimin gisik ra·atangengon, skangona bate da·oni somoio manderangni bijoliko jakkalanirang namen tang·dobataha ine aganenba, skangni salrangode ceiling-o bangka ge·sa chatna man·on man·e cha·gipa gitasa chanaiachim, indiba da·oni somoiode manderangni noko jakkalenggipa rokom-rikkit bosturang dongani a·sel bijoli jakkalaniba aro bijoliko nanganiba batrikrikaha ine Power Minister aganangaha.
MeECL-ko nambate chalaina namen rakbegipa kam ong·a aro iako bakande namatna gita man·jawaha ine aganangenba, dingtang dingtang bijoliko watgiparang aro distribution company-rangna gamkugijagipa mamlani giminba ua skanggipao done kamko ka·atenga ine minister parakataha.
MeECL-o kamko ka·enggiparangni neng·nikaniko mai cholchi namatna miksongenga ine sing·anina, MeECL-ni bijoliko badinge man·gipa tangkarangchin corporation-o kam ka·enggiparangna dormahako on·na man·na nangachim ine Power minister aganchakangenba, da·omanchade MeECL-ko maming man·gni grisa chalaiengani gimin, gimaaniko komiatna gita chol-ramarangko sandie kamko ka·na nanggen, indake dakanichisa corporation-ni officer-rangna nambate dangdike on·skana man·gen, maina uamangoni bang·batan pension-rangko man·tokjaenga ine aganan baksa, batanggimin somoio NTPC baksa songgigrikani a·sel da·alo MeECL -ko chalaianio neng·nikaniko man·enga aro ia mamlako NTPC baksa namatani ja·mansa a·doko bijolini a·bako chinga nambata gadangona ra·doangna gita man·gen ineba Pa Mondal agandapataha.
