Tura, Dec 12: Mongolbar salo, Mega Ex-servicemen Rally-ko Headquarters 101 Area, Indian Army aro Meghalaya a•dokni Rajya Sainik Board, Tura-o ong•atangaha.

Ia tom•bimonganio, Meghalaya a•dokni ex-servicemen-rang ba a•songna dangdike kamoni neng•take dongenggipa sipairang aro Veer Nari-rang baksana Armed Forces-ni a•gipi Officer-rang aro mande ra•ako man•a kragipa mingsinggipa manderang bakko ra•angaha.

Ia tom•bimonganiko ong•atani miksonganiara, dakgrikani a•bao bak ra•gipa gitcham sipairang, be•enni gita neng•nikaniko man•gipa sipairang aro randi me•chikrang, kamoni neng•takatako man•genchimoba sipai dolrangni jong adarang gita chacha ekgrikatna man•gijagipa ong•a ine mesokna gita aro unbaksana, pension, an•sengbaljokani aro kamo rakkitaiani gimin u•iataniko on•a gita ia program-ko ong•atani ong•achim.

Unbaksana, kamoni neng•take dongenggipa gitcham sipairangna aro uamangni nokdangni nanganirangko dangdike on•a gita dingtang dingtang dolrangba bakko ra•angaha. Ia tom•anio, ECHS, Army Welfare and Education Society (AWES), ma•mong sorkari aro a•dok sorkarini on•enggipa man•gnirangni giminba u•iataniko dakangjolaha.

Ia Mega Ex-Servicemen Rally-ko ong•atanio Tura-ni MP Agatha K Sangma, mongsonggipa sokgipa ong•e, tom•anio bak ra•giparangna aganprakengon, gitcham sipairangko uamangni kamrangna mittelpilangenba, gitcham sipairangko pangnan mande ra•china gita a•doko songdongenggipa manderangko didiangaha.

Bang•bata sipairangan dambemitingon kamoni neng•takrongani gimin sorkari, gitcham sipairangni janggi tanganio dakchakanirangko on•na aro bading chiwale cha•ani cholrangko on•na gita CM Elevate, PRIME aro uandakgipa scheme-rangko ra•gate on•aha ineba Sangma aganaha.

Meghalaya a•doko Sainik School-ko kulina gita a•dok sorkari, cholrangko nienga ineba ia tom•anio Tura-ni MP, jinmana parakataha.

Iakoba poraie nina man·gen: West Khasi Hills-o skulni headmaster aro skigipa saksako dakait daka