Shillong, Jul 21: Meghalaya Lakadong Turmeric Integrated Development Mission-ko Mongolbar salo, Development of North Eastern Region (DoNER) Minister Jyotiraditya M Scindia, Meghalaya a•dokni Chief Minister Conrad K Sangma, a•dokni Agriculture & Farmers Welfare Minister Timothy D Shira aro gipinrangni dongpaanio, New Delhi songjinmani Sanchar Bhavan-o a•bachengate on•angaha aro ia program-o video conference gita Shillong songjinmaoni dingtang dingtang official-rang bak ra•angtokaha.
Ia gong crore 175.45 ong•gipa project-na DoNER/NEC Ministry, India sorkarini Agriculture & Farmers Welfare Ministry aro Meghalaya sorkariba tangka paisarangko chape on•aha.
Ia Mission-ko a•bachengate on•anganio DoNER Minister Jyotiraditya M Scindia, jinmana aganprakangengon, ia tom•aniara, salgro salaram a•dokrango namroro silroroaniko ra•bana Prime Minister Narendra Modi-ni niksamsoaniko mesokgipa Mission Golden Spice-ko a•bachengatani ong•a ine parakangaha. India a•songni salgro salaram a•dokrangara da•o a•songni namroro silroroanio mongsonggipa bakan ong•aha ineba ua aganaha.
A•dok ge•antini unique selling proposition (USP) ba bosturangni dingtangmanchagipa ong•ani aro gama ge•anio me•chikrangni daitorangni giminba ia tom•anio Union Minister aganangaha.
Mission Golden Spice-ko a•bachengataniara, a•gilsak gimikna bosturangko palna sim•na chol baksa dingtanganiko ra•bagipa program gita ong•enga ine janapatengon, ian game ge•e cha•enggiparangna, mongsongbate me•chikrangna janggi tangani cholko on•na dakchakgnok ine Scindia aganaha.
Meghalaya a•doko game ge•e cha•enggipa me•chikrangni daito aro uamangni namroro silroroanio on•gilanirangkoba DoNER Minister janapangaha.
Ia program-ara, Meghalaya a•doko man•gipa Lakadong holdiko, United States, European Union, Japan aro Gulf-ni gital bazaar antirangona sokatna miksonganian ong•enga ineba ua aganaha.
Game ge•e cha•enggipa me•chikrangni rakbee kamrangko ka•enganina mittelpilangengon, Meghalaya a•dokni Lakadong holdiko G7 Summit-o Prime Minister Narendra Modi-ni mesoke on•anganian mingsa chu•sokani ong•aha ine Scindia aganaha.
Ia tom•anio Meghalaya a•dokni Chief Minister Conrad K Sangma-ba aganprakangengon, Union Minister Jyotiraditya Scindia-ni dilanichi DoNER Ministry-ni ning•o salgro salaram a•dokrang, dingtanganiko nikna man•aha ine parakataha. Lakadong holdiara, Meghalaya a•dokni Jaintia Hills-na namen dingtangmanchagipa ong•a aro iako Meghalaya a•dokni gipin biaprangoba apsan dake ge•na man•jawa ineba Sangma aganaha.
Lakadong holdichi, hajalni hajal game ge•e cha•gipa me•chikrangni janggi tanganiko dingtangatna man•aha ine janapatengon, ia Meghalaya Lakadong Turmeric Integrated Development Mission-ko a•bachengatanichi, gama ge•ani kamrangko tang•doatan baksana game ge•e cha•giparangnaba bang•en namgniko ra•bana man•gnok ine Chief Minister aganaha.
Meghalaya a•doko game ge•e cha•enggipa manderangna sorkari, pilak nanga bosturangko aro tangka paisani gita dakchakanirangko on•enga ine janapatengon, ia Mission-ko salgro salaramni gipin a•dokrangoba ja•rikpae, gama ge•aniko tang•doatna aro game ge•e cha•enggiparangna namgniko on•na gita ia program-ko chu•sokgipa ong•atna rake kamko ka•gen ine Chief Minister, ku•rachakaniko on•angaha.
Na·simang iakoba nina man·gen:
Na·simang iakoba poraina man·gen: A•songo rikenggipa Meghalaya House-rangko CM nipilanga
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
