Tura, Oct 6 : Batanggimin somoio Mendima Deficit Upper Primary School-o sakgni skigiparangko rakkiani gimin jegalanirangko Headmaster Cum Secretary Pa Nicarson B Sangma-ni kosako niam gita re⋅gija sakgni skigiparangko kamo donataha ine matnange jegalaniko Mendima Deficit UP School-ni mikkango dakangaha. Ia a⋅sel ong⋅aniko talbate ma⋅sina Hub News, Pa Nicarson B Sangma-o adita nangchapgipa sing·anirangko dakangaha.
Illegal appointment ba niam gita re⋅gija kamo rakkianina manderangni matnanganira baditana kakket ong⋅a ba ong⋅ja ine sing⋅on, Pa Nicarson-ni aganani gita, Uamang schoolo skigipa sakgniko nangengani gimin managing committe chanchichenge sakbonga MC member-rang President, Vice President, skulni seoke watatgipa sakgni aro headmaster an⋅tangan School-ni DI-ko gronge uni ku⋅pattianiko ra⋅chengaha. DI-ni ku⋅pattiani gita, skigipani kamna nanggipa lekka-porani gadangko janape advertisement-ko on⋅ataha.
Indake tik ka⋅gimin gita DI an⋅tangan chairman ong⋅e Feb 20, 2021-o interview-ko ra⋅aha.
Interview-ko ra⋅na skang Managing Committe-oni maiba chanchiako naatani donggenma ine DI-ni sing⋅on, nambatgipa candidate-kon merit list-o pangchake ra⋅na ine tik ka⋅e namniktokaha. DI an⋅tangan interview ra·gipani Score sheet-ko chandime merit-o pangchake skigiparangko baseanio result-ko tariaha. Result-ko on⋅ani ja⋅mano Vice President Tribethison K. Sangma gittamgipao nakatgipako kamo ra⋅na nangnikaniko janapaha indiba gipin MC member-rang DI-ni Merit list-o on⋅gipako ja⋅rikna nanggen ine jegalskaaha. Indiba vice President-ni gittamgipa list-o nakatgipa candidate-ko seokna draani gimin uko donaton gipin MC member-rang resolution-o soi ka⋅na jechakaha aro DI an⋅tangba ra⋅chakna jechakaha. Ia obostarang ong⋅on angni Head Assistant, DI an⋅tangan chairman ong⋅e interview-ko ra⋅e kamna kragipa manderangkon seokahani gimin gipin dakteanide kraani ong⋅jawa ine angko Director-ni ku⋅pattianiko ra⋅china aganaha. Director-ba merit list-o seoka man⋅gipa candidate-kon kamo donatchina ge⋅etaniko on⋅aha aro DI-ba ukon approve ka⋅aha. Kamna seokanio tik ong⋅en niamko ja⋅rika aro uko managing committee-ni ma⋅sianion kam ka⋅aha ine Pa Nicarson B Sangma talatangaha.
Minggipin matnanganiara, result-ko notice board-o tapja aro uko Robibar salosa parakataha ine matnanganina na⋅a maiko aganchakgen ine Hub News sing⋅on, skanggipa Result-ko anga Feb 22 2021-o notice board-on tape parakataha aro iako kamna seokako man⋅gipa candidate-rangan photo ka⋅e ra⋅angpilahachim aro appointment-ko 13 May 2021 tariko on⋅aha. Ian Robibar sal ong⋅ja indiba Bristibar salsa ong⋅a ine Pa Nicarson Sangma aganchakaha.
Jegalgipa dolni joltangni candidate-ko rakkija ine matnanggipani gimin sing·on, Pa Nicarson, ia chu·gimikkon pilak MC Member aro DI-ni namnika gita merit-o pangchake nambatgipako rakkina tik ka⋅a gitan skigiparangko appoint ka⋅aha ine parakataha.
Skigiparangko baseanio maiba daksrukani gnangma ine School-ni President Pa Gening M. Marak-ko sing⋅on, pilak MC memberang iani gimin name ma⋅sia indiba, gittamgipa merit list-o donggipako gnigipa list-o donatna agananiko jechakani giminsa uamang ma⋅ekangaha ine parakataha.
