Williamnagar, Oct 06: Re·anggipa September 30 tarik walo Tura-oni Shillong-ona re·angenggipa MTC night bus garini Nongchram songni dolong ka·machina bilsruange a·sel ong·anio jokkom ong·giparangko naljokatna dakchakaniko on⋅gipa sakbri chadamberangko a·jani Deputy SP Pa Anthony Ch. Momin aro Victor N. Sangma, Rongjeng-ni OC aro Williamnagar-ni Sub-Officer-ni dongpaanio East Garo Hills-ni SP Pa Bruno A. Sangma-ni jakchi certificate aro tangkarangko on⋅e Williamnagar SP office-o Butbar salo mande ra·aniko dakangaha.
A·sel ong·ani somoio dakchakgipa sakbri chadamberangara Nongchram songoni Sengrik D. Sangma, Nilbath D. Sangma, Walgrik M. Momin aro Jinjas D. Marak-maang ong·achim.
Rasong gribee tanggitik a⋅sel ong⋅ani somoio jokkom ong·gipa manderangko naljokatna dakchakanina uamangko mittelpilangengon, indakgipa a⋅selrango manderangna dakchakaniko on·aniara police mangmangni kamsan ong⋅aija indiba an⋅ching sakantini kaman ong⋅a ine a·jani SP Pa Bruno Sangma uamangko mande ra·pilskae aganangaha.
Ia obosta ong·angani bidingo ua somoio manderangko naljokatna dakchakgipaoni saksa Sengrik D. Sangma-ni aganani gitade, attamo robol ga·tinge roani ja·man uamangni roengmitingo walo re·gipa MTC garini ta·rakprete salangako nikrikaha aro adita somoini ja·manon gari ga⋅aka gam⋅aniko uamang knaaha. A·sel ong·gipa biapona uamangni sokangon a·damo nigipa manderangde bang⋅achim indiba dakchakgiparangde saksaba dongjachim.
Iachi an·ching mingsako nikatna man·a, chong·motan, da·ororo ramadilo dingtang dingtang a⋅sel ong⋅miting somoirango an⋅ching dakchakgiparangko man·rongja indiba mobile-rangchi noksarangko ra⋅e ja·mano uarangko social media-o gipatanirangkosa nikrongbata.
