Tura, March 31: North Garo Hills a•jani Resubelpara Block-o Mahatma Gandhi National Rural Employment Scheme (MGNREGS)-ni ning•o job card donggipa manderangna on•enggipa kamrangko chu•gimik man•tokjaha ine Bristibar salo songni manderang, Resubelpara-ni block development officer-ko matnangenba jinma chadrapna jotton ka•aha.
Ia a•sel ong•ani Bristibar salo, MGNREGS-ni kamrangni gimin Social Audit hearing-ko dakengmitingo ong•aha.
Koborko on•ani gitade, ia scheme-ni ning•o songni manderangna sal 100-ni kamko on•ani ong•achim indiba songni manderang chu•gimik kamrangko man•tokjaha ine BDO-ko matnangenba, chadrapna jotton ka•aha.
Songni mitam manderangde, bilsi gimiko sal 30-40-ni kamrangkosan man•aiaha ine chu•gimik kamrangko man•jahani gimin block official-rangko matnangtokaha.
Iani bidingo Resubelpara-ni BDO, songni manderangna agan-talate on•na jotton ka•ahachim indiba manderangni ka•a ding•chaoaniko namatna gita man•jaha aro uandaken ja•mano songni manderangko tom•tomatna gita ua biapona police-rangko okamatna nangao ga•akaha.
Indake ong•engon, iani bidingo ta•raken am•sandianirangko dakenba report-ko on•china gita North Garo Hills a•jani Deputy Commissioner RP Marak, DRDA-ni project director-na ge•etaniko on•ataha.
