Shillong, March 31: Meghalaya police aro Ministy of Home Affairs nangrimenba, mande palbadinganiko kosako kamko ka·ani ba anti-human trafficking-ni bidingo, Shillong-ni State Convention Centre-o salsana State Level Conference-ko ong·atangaha, aro ia conference-o dal·dalgipa aro niksenggipa manderang jekai, Director General of Police (DGP) LR Bishnoi, Meghalaya State Commission for Protection of Child Rights-ni chairperson, Iamonlang Syiem, Meghalaya State Judicial Academy-ni Director, KML Nongbri, aro gipinrang bakko ra·angtokaha.
A·dokni DGP, tom·ao aganprakangengon, mande palbadingani mamlarangko am·sandiatani kamrango gipin mamlaming tosusaede namen ra·bianirang gnangbata aro dos dakgiparangko sasti on·aniba namen komia ine aganenba, batanggimin bilsi-dokrango Meghalaya-o ia mamlarangko segatani gitade, mangmang ming 19 case-rangkosan segataniko nikna man·aiaha, uarangoni minggittam ba mingbri case-rangosan dos donggiparangko sasti on·na gita man·aiaha ine LR Bishnoi parakataha.
Mande palbadingani ja·pangara minggni a·selrang gnang ine talataniko on·angkuengon, skanggipara, songsalo janggi tangani cholrang donggijanichi, kangal-cha·asianichi, kam man·gijanichi, a·jao maming namroro-silroroanirang donggijanichi ong·a ine talatangenba, gipin a·dokrangming nisusaatode, da·ororo an·chingni Meghalaya a·doko rusigimin nokdangrang aro segri ma·giparangni nokdangko chalaianirang namen tang·doenga, iarangchiba chasong dambe me·a aro me·chik bi·sarangko nokdangtangtango sinjetanirangko man·anichi mande badinganiona altuaen sokatangenga ine DGP parakataha.
Minggipinara, kam grigipa manderangna kamrangko on·na ku·rachake India-oniko a·gilsakni gipin bakrangona rimanganichiba iandakgipa obostaona sokangenga ine LR Bishnoi agandapataha.
Indake ong·engon, mande palbadingani mamlarangko champengna gitade, manderangna mikrakatanirangko on·an baksana, iandakgipa kamo gisiko nanggiparang baksa nangrime kamko ka·na nanggen aro iano media-ni kamba mongsonggipa ong·a ineba a·dokni DGP aganangaha.
