Shillong, Sept 08: Constituency-ni manderangko batanggimin bilsi 20-rangna kingking cha·bokbaaha ong·ode, NPP dolni a·gipi dilgipa aro dolni vice president Pa Prestone Tynsong-ko namnikgipa ba una chakgiparangna ian mikrakatani gita ong·engaha ine BJP dolni MLA Pa AL Hek, Bristibar salo aganangaha.

Uni iandakgipa kattako agananiara, adita salrangna skang Mawlai-o NPP dolni gita tom·ao Pa Tynsong, “Chinga MLA-rang aro eleksino susagipa candidate-rang pu·ongiparangko cha·boke aganronga aro pu·ongiparangba tol·mikgipa kattarangni ja·gao altue ga·akronga, ian ong·enga. Chinga, manderangko bilsi-bonga prako cha·bokronga aro uamangba chingchi cha·bokaniko man·ronga” ine jinmao aganangani gimin ong·achim.

Re·baenggipa 2023 eleksino uni indakgipa kattarangna manderang aganchakchina gita Pa Tynsong an·tang constituency-ni manderangko cha·bokbaenga ineba Pa Hek matnangataha.

Political dilgipani iandake agana kattarangko jegalatenba, ua saksa dilgipa ong·e dilgipana krakra dake aganna nanga ine Pa Hek chanchitangkoba parakataha.