Shillong, Jan 15: Meghalaya a•doko, drugs ba pekatgipa samrangko jakkalani aro ma•manti ong•gija dakgipa kamrangko champengna ja•ku de•anio a•dok sorkarini CCTV camera-rangko chate on•ani 70 ba 80 percent-mangni gita matchotaha ine Bristibar salo, a•dokni Chief Minister Conrad K Sangma parakataha.
Skanggipa bako Shillong songjinmani dingtang dingtang gittimrango ge 227 CCTV-rangko chate on•na man•aha ine u•iatengon, da•o gnigipa bako ge 200 CCTV camera-rangko chate on•na a•bachengatgnok ine Chief Minister parakataha.
Chief Minister-ni aganani gitade, Shillong, Tura aro Jowai-ni dingtang dingtang biaprango CCTV aro streetlight-rangko chate on•na sorkari kam ka•enga aro ia kamko bilsisani gisepon matchotna ka•dongenga.
Ia kamko chu•sokatna gita sorkari, dingtang dingtang gittimni dilgiparang aro jolo songdongenggipa manderang baksa nangrime kamko ka•enga ineba Chief Minister aganaha.
