Shillong, Sept 17: Gipinchini re·bae a·doko niam gri songdongenggipa manderangko sandirokatna gita jinmani ra·chakanggimin Meghalaya Residents Safety and Security Act (MRSSA)ko a·doko ra·gatani gimin sorkari namen dal·e ra·enga ine skotong minister Pa Conrad K. Sangma, Assembly-o u·iatangaha.
MRSSA-ko a·doko ra·gatani gimin MDA sorkari maiko dakatenga ine warachakgipa dolni Assembly tom·ao sing·doanganina, Umling-o entry-exit point aro facilitation centre-ko badia sorkari a·bachengataha, da·o rikenggipa sorkari ong·jama? Ia kamna dingtang dingtang committee-rangko aro task force-rangko donatgipa aro a·bachengatgipa da·oni sorkari ong·jama aro MRSSA-ko ra·gatnasienggipana da·alo pilak kamko online system-o tarisoenggipa ia sorkari ong·jama? ine skotong minister aganchakangaha.
Napdrabagiparangko nirikkiatna gita Meghalaya a·doko MRSSA-ko ra·gataniko sorkari namen dal·e ra·enga ine u·iatangan baksa, iako a·doko maidake ra·gatgen ua pilakni niamrangko chu·gimik tale ra·china gita jasana skang mangmang police department aro NIC baksa tom·e chanchirimangaha ineba Pa Sangma u·iatkuaha.
“Iako dake-ka·e nichengani kamko a·bachengna gita chinga tik ka·aha, jena nanggipa software-ba dongaha aro MRSSA-ko ra·gatna gita chinga pilak kamkon online gitasa ka·anggen” ine skotong minister House-o aganangaha.
