Tura, Aug 29: NCP-ni padot aro MLA Pa Saleng Sangma, MLA scheme mangmangchide manderangna dakchakna chu·ongja ine agana.
MLA scheme-ni gimin niatgenchimode iana skangde kror 2 kosan man·aia indiba ia bilsi dipet kror 2 lak 50 ko man·enga aro area-nade ia scheme-an dal·batgipa scheme-ba ong·a, uni gimin ia MLA scheme-ni gimin manderangni ma·sisretaniko dingtangatna iako bon·atsrangna man·ode ba nangarangna dakchaksrangna gita baridapatna man·ode nambatnaba donga ine sorkariko mol·molna nangnika ine Pa Saleng aganaha.
Uni agankuani gita, MLA-na pu·onjokode manderang ia scheme-kosa dal·bate ra·a aro iandakgipa chanchianiara ong·ja ine janapatengon, a·jatangni ning·o donggipa hospital-rang, PHC, CHC-rangko bariatna ba rama-jal·angrangko namdapata gita chanchianirangko ra·ange chinga minister-rangko grongronga indiba manderang iandakgipakode development chanja aro ia kror 2 lak 50 -chi area-tangna chinga mai namgnirangko chu·sokate on·na man·gen, maina MLA scheme-ni miksonganian dingtang dingtang department-rangni sokatgijagipa namroro-silroroaniko area-tango kolgapate on·nasa onga.
Unbaksana, ia salrangode skia-pora aro maming u·iani griba manderang MLA-na skatang chakatenga, indiba jemangan IAS officerrang, dal·dalgipa officerrang aro dal·dalgipa ministerrangko gronge agangrikna pa·a aro department-rangoniko area-tangona pilak namroro-silroroaniko ra·bana man·a uandakgipa mandekosa mikkangchide manderangba basee seokna man·gnok aro ia scheme grijokode manderangba skatang chakatna pa·sokjawajok, uni gimin ia scheme-ko bon·atsrangchina ba ong·jaode bariatsrangchina gita mol·molanirang baksa re·baenggipa Assembly tom·ao iako call attention motion-o naatna miksongani ong·enga ineba Pa Saleng agandapaha.
