Tura, December 13: Sonibar salo, Nokrek Heights School uni Annual School Day-ko District Auditorium-o maniangaha, jeon “Etenity” ba jringjrot ine pangchakaniko done, doka-dam·achi, chrok-mesaachi, aro dakmesokanirangko dakangaha. West Garo Hills-ni (WGH) Deputy Commissioner Vibhor Agarwal mongsonggipa sokgipa ong·e re·baaha aro MSCPCR-ni Chairperson Agatha K Sangma-ba re·bae ia manianio bak ra·angaha.
Chasong gitalni somoirang baksa nangrime re·enganina, mongsongbate Artificial Intelligence-ko (AI) jakkalani, gisikni an·seng-baljokani bidingo mikrakatani, aro social media-ko namedake jakkalani bidingo skie on·anirangna Deputy Commissioner school-ko mitele aganangaha. Meghalaya-ni chadamberangna ramako mesokna nangani gamchatani gimin aganenba da·ororoni cha·song a·dokni chadamberangna nambatgipa sal-somoirang ong·enga ine ua talatangaha.
Uandake annual day program-rangara bi·sarangko an·tangtangni changa-sapaniko mesokna aro dingtang dingtang dake nianirangko bak ra·e an·saona cholko on·a ine aganenba, ua an·tangni bi·samiting salrango annual day-o bak ra·aniko gisik ra·atpilaniko dakangaha.
Dingtangmancha okamako man·e program-o bak ra·e jinmana parake aganatengon, Agatha K. Sangma, a·dokni education system-ni miksongani gitan, ia school-nichatro-chatrirangko poraia-skianirangosan ong·aija indiba janggi tanganio ong·chongmotgipa obostarangko chagrongna tarisamsoanina mitele aganangaha.
Bi·sarangni mobile phone-rang aro social media-rangko jakkalanirangko namedake nirokchina aro online-o namgijagipa manderangoni naljoke rakkichina ua ma·a-paarangna raken mikrakataniko on·angaha. Australia-o bilsi chu·onggijagiparangna social media jakkalaniko beng·e niam ra·gatanirangko ua janapenba, naljoke dongna ma·a-paarangni nirok-simsakaniko nangchongmota ine ua talatangaha.
School-ni chu·sokgiminrang aro re·mikkanganio nichaksoanirangni gimin school-ni motto-rang ‘Simul Possumus (an·ching ku·cholsan chu·sokatna amgen) aro “Quarrer Invennio Grandis”-o (Sandibo, u·ie ra·bo, aro dal·rorobo) pangchake, Nokrek Heights School-ni Managing Director, Dr. Jasmine B. A. Sangma jinmana agan-talate on·angaha.
Poraia-skianiko namdapatanio school-ni krenge kam ka·anirangko ua janapenba, 2019 bilsi dipetonin 100% board resultrang man·baenga, uandake 2024 bilsioni Class 11 aro 12-ko Science aro Humanities-o a·bachengataha ine ua aganangaha. Gitalgipa technology-rangko jakkalani bidingo janapenba, dal·bata klas-rango gital chasongni AI klassrangko ra·na tarisamsoanio Tura-o Nokrek Heights schoolosan Design and Innovation Lab ong·aia ineba ua agandapaha.
Ia manianio dingtang dingtang Hindi, Garo aro Sastro-oniko dakmesokanirangko dakangaha jekai The Prince of Egypt – Musical Play, Apocalype Paused by Children, Baghban aro Do·uang. Una agreba, school choir-ni git ring·anirangko dakangaha aro chatro-chatrirang India-ni dingtang dingtang jatrangni chrok-mesaanirangkoba dake mesokangaha.
Na·simang iakoba nina man·gen:
Na·simang iakoba poraina man·gen: “Ha LyngkhaBneng – The Elysian Field” jawilwatko Shillong-o wate mesokanga
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
